Cargando....
Concello de Lugo
28/03/24
NOVAS
Escoita esta páxina

O Concello de Lugo exporta seus almorzos saudables


# Xoves, 15/03/2007
A alimentación saudable, aposta do Concello no Día Mundial do Consumidor

O Concello de Lugo está a exportar o modelo dos almorzos saudables que puxo en marcha hai catro anos e que recentemente foi coñecido in situ pola propia Ministra de Sanidade, Elena Salgado. O Alcalde explicou que varias comunidades autónomas como Cataluña ou Asturias demandaron información ó Concello para poñer en marcha este mesmo modelo. López Orozco compartiu o Día Mundial do Consumidor con 120 persoas, a maioría da Asociación de Amas de Casa e Consumidores.

O Alcalde de Lugo, a Concelleira de Servizos Xerais, a Presidenta da Asociación de Amas de Casa e Consumidores, o Delegado Provincial de Sanidade, o Director Provincial do SERGAS e a Delegada Provincial de Sanidade da Coruña asistiron ó almorzo saudable que celebrou, no Hotel Torre de Núñez, o Concello de Lugo con 120 persoas da Asociación da Amas de Casa e Consumidores.

Varias cidades e pobos galegas como Ferrol, Pontevedra, Guitiriz ou o Caurel e comunidades autónomas como a catalana ou Asturias solicitaron información á Concellería de Servizos Xerais para crear almorzos saudables como os de Lugo. Os especialistas afirman que está cientificamente demostrado que os nenos e adolescentes que almorzan fan unha mellor distribución das calorías inxeridas, teñen máis capacidade de atención e participación na clase e son máis felices.

O Alcalde amosou a súa "satisfacción e orgullo de cidade por poder exportar os nosos almorzos". López Orozco lembrou as dúas guías de saúde editadas recentemente polo Concello e avogou por unha alimentación saudable e un consumo responsable.

O mandatario municipal destacou o papel da Asociación de Amas de Casa "porque vostedes defenden os intereses públicos e evitan calquer abuso ó consumidor". O Alcalde afirmou que seguirá a colaborar con asociacións como esta que ademais traballan en favor da cidade sen ánimo de lucro.

Os comensais compartiron un almorzo saudable con froita, cereais, lácteos e pan con aceite. Para rematar, a Delegada Provincial da Coruña, experta endocrina do Hospital de Santiago, ofreceu unha conferencia sobre alimentación saudable.


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova