Lugo presentou os seus proxectos no segundo Foro de Cidades Dixitais de Galicia, que se está a celebrar no Gran Hotel e está organizado polo Concello da capital. O Alcalde de Lugo, o Conselleiro de Traballo, o Rector da Universidade de Santiago e a Concelleira de Servizos Xerais inauguraron o II Foro de Cidades Dixitais de Galicia, no que están están inscritas 130 persoas, superando as expectativas previstas.
Na inauguración oficial, o Alcalde apostou por “familias dixitais” para que todos os seus membros saiban empregar as novas tecnoloxías. López Orozco explicou as políticas que se están levando a cabo como os novos telecentros, os cursos de formación nos barrios ou o seu propio blog “onde teño a oportundiade de escoitar a voz de moita xente que non coñezo e dan opinións con liberdade”.
Pola súa banda, Ricardo Varela afirmou que a Consellería de Traballo dedicará máis de 186 millóns de euros ó fomento de iniciativas tecnolóxicas innovadoras ata o ano 2009. O responsable de Traballo aclarou que a economía baseada no coñecemento ten unha “crecente influencia no emprego”. O Rector destacou que Lugo “é un exemplo de cidade histórica e milenaria que pode adaptarse ás novas tecnoloxías”.
Entre as cidades dixitales participantes están Vigo, A Estrada, Cantabria, Avilés e Leganés, mentres que as que están en proxecto presentes son Alcobendas, A Coruña e Segovia. Tamén participarán Vilalba e As Pontes como vilas dixitais invitadas.
Lugo asinou no ano 2005 o proxecto Lugo Dixital, que contou cun orzamento de 1.535.000 euros, ampliado posteriormente co programa Lugo Singular con 1.100.000 euros. Desde entón, o Concello puxo en marcha diferentes proxectos: o 010, o programa Conéctate en Lugo que está circulando por todos os barrios da cidade, a modernización dos equipos informático da administración, da web municipal, a creación da tarxeta cidadá e proximamente o programa ABRED para nenos enfermos, entre outros.
Inauguración por videoconferencia
O Director Xeral de Comunicación Audiovisual da Xunta de Galicia, Manuel José Fernández Iglesias, ofreceu a primeira conferencia do Foro e inaugurou a través de videoconferencia con Luisa Zarzuela un telecentro no municipio coruñés de Vedra desde a nova Aula Multimedia do barrio do Castiñeiro.