O Concello de Lugo e a Armada renovaron os seus vínculos

# Luns, 02/04/2007

O Concello entregou á Armada outra bandeira española en substitución da Bandeira de Combate que lle regalou hai 25 anos.

A Corporación Municipal e a Armada renovaron, por 55º ano consecutivo, os seus vínculos e a tradición de render homenaxe á Virxe da Esperanza -patroa da Armada- nos actos oficiais que se desenvolveron pola mañá e que continuarán pola tarde coa participación na procesión do primeiro luns de Semana Santa. Este ano, como novidade, o Concello fixo entrega dunha nova bandeira á Armada en substitución da que lle regalou hai 25 anos.


Cen membros da Unidade formaron na Praza Maior e fixeron o tradicional desfile, diante a atenta mirada de centos de lucenses. Acompañando ó Almirante Xefe do Arsenal de Ferrol –Francisco Cañete Múñoz-, atópabase o Comandante do Tercio Norte, o Vicario Castrense de Ferrol, o Xefe de Seguridade Naval, o Xefe de Organización, o Xefe de ORP de Ferrol e a Axudantía Maior. A Compañía de Honra, que formou na Praza Maior desde as doce do mediodía, estivo composta pola Escuadra de Gastadores do Tercio Norte, a Banda de Música do Tercio Norte, a Bandeira e Abanderado tamén do Tercio Norte, dúas seccións do Tercio Norte e unha do Arsenal, así como o Armamento Orgánico da Unidade.


O acto de entrega da nova Bandeira española á Armada, en substitución da que lle fora entregada no ano 1982 ó Tercio Norte, foi o momento máis solemne. A entrega foi realizada pola Concelleira de Servizos Xerais, Luisa Zarzuela, ataviada coa tradicional mantilla. A bandeira substitúe á xa deteriorada despois de 25 anos de uso. Está completamente bordada nas dúas caras, con hilos de ouro, prata e sedas.


Nas intervencións públicas do Comandante do Tercio Norte e do Alcalde, éste ultimo protagonizou un dos momentos máis emotivos cando pediu romper o protocolo para poder bicar á bandeira porque dixo, “non o puiden facer no seu momento”. López Orozco reivindicou na súa intervención a paz e avogou, nun discurso bilingüe, pola “unión de esta Europa que está naciendo”. O Alcalde ofreceu en nome dos lucenses “nuestra lealtad a la bandera y a todos los símbolos que representan a las comunidades autónomas”.


O Almirante Xefe do Arsenal de Ferrol pasou revista ás tropas e saudou co Alcalde de Lugo ás autoridades presentes, entre os que se atopaban a Corporación Municipal, parlamentarios galegos, deputados nacionais, autoridades dos corpos de seguridade e dos distintos exércitos.


Sinatura no Libro de Ouro

Despois do desfile da Forza, as autoridades escoitaron un pequeno concerto a cargo da Banda de Música da Armada desde o balcón da Casa Consistorial. A continuación, o Almirante Xefe asinou no Libro de Ouro da cidade e intercambiou agasallos institucionais co Alcalde de Lugo.


Tras un pequeno refrixerio, as autoridades participaron nun xantar. Xa pola tarde, agárdase a participación de miles de lucenses na procesión na honra da Virxe da Esperanza, que comezará ás oito da tarde. A Armada é Irmán Maior da Irmandade da Nosa Señora da Virxe da Esperanza.

Este martes continuarán os actos oficiais coa participación do Exército de Terra.

Galerías de fotos da Semana Santa lucense 

Compartir: