A Biblioteca Municipal, situada no parque da Milagrosa, acollerá mañá, xoves, unha nova actividade organizada dentro do ciclo promovido para a animación á lectura e contacontos, que organiza a Concellería de Cultura de Lugo, que dirixe Concepción Burgo.

A actividade de mañá será unha sesión de contacontos a cargo de Ana Carreira, que leva por título “Moito conto”. Como nas anteriores ocasións, será ás seis e media da tarde.

O programa levarase a cabo entre os meses de marzo e xuño, todos os xoves cada quince días.

A próxima actividade será o 10 de maio e consistirá nunha charla lúdico pedagóxica a escolares na Feira do Libro.

Este amplo programa está dirixido a nenos de entre 3 e 12 anos. Enmárcase nas políticas de impulso da Biblioteca, que xa están dando os seus froitos no aumento do número de préstamos e socios.

O programa anual de animación á lectura e contacontos contempla, para o primeiro semestre do ano, numerosas actividades entre o 22 de marzo e o 21 de xuño: contacontos, charlas sobre María Mariño (a escritora homenaxeada nas próximas Letras Galegas), talleres, actuación dun clown, varias actividades infantís dentro da Feira do Libro, etc.

Este programa de animación forma parte das políticas postas en marcha para impulsar a Biblioteca Municipal. A Concelleira de Cultura, Concepción Burgo, adiantou que para o vindeiro mandato un dos obxectivos é aumentar o orzamento municipal nesta dotación, mellorar as súas instalacións, solucionar os problemas de falta de espazo, comprar máis fondos e organizar máis actividades.