A Concelleira de Cultura, Concepción Burgo, confirmou hoxe a información aparecida en dúas webs de programadores de concertos, pola que o grupo El Sueño de Morfeo actuará o día 10 de outubro en Lugo durante as festas de San Froilán.
Este grupo realizará durante o verán unha xira que significará unha parada en Lugo ese mesmo día. A actuación terá lugar na praza nova do Seminario a partir das oito e media da tarde.
A Concelleira indicou que aínda non están confirmadas o resto de actuacións que se celebrarán durante as festas pero adiantou que tanto El Sueño de Morfeo como o resto de concertos seguirán a tradición de ser gratuítos.
Por outra banda, adiantou que nos próximos días presentará unha programación de verán na que figuran actividades de todo tipo e para todas as idades e na que se ofrecerán novidades.