Preto de cincuenta parellas contraeron matrimonio no Concello ao longo deste ano

# Mércores, 18/07/2007
Un total de 46 parellas contraeron matrimonio na Casa Consistorial ao longo deste ano, o que supón un aumento do 17% con respecto ao ano pasado, cando polas mesmas datas celebraranse 38 casamentos.

O Alcalde, José López Orozco, segue a ser o edil que máis vodas oficia, pois durante estes sete meses casou a 24 parellas, máis do 50% das cerimonias. Luisa Zarzuela e José Piñeiro son os seguintes no “ranking” de oficiantes con cinco vodas cada un, seguidos de Carmen Basadre e José Ramón Gómez Besteiro, con tres casamentos ambos os dous. Os concelleiros José Manuel Díaz Grandío, Rosana Rielo, Dolores Vieiro, Concepción Burgo e Alicia Peña celebraron unha voda cada un; mentres, a edil Sonia Méndez estreábase como oficiante o pasado 23 de xuño.

Precisamente, o 23 de xuño foi o día que máis vodas se celebraron no Concello este ano, oficiándose seis cerimonias. Algunha das parellas escolleu esta data aproveitando que a festividade do San Xoán coincidiu en sábado. Como é tradicional, coa chegada da primavera e o verán o número de solicitudes disparase, pois en abril tiveron lugar 10 vodas, en maio 7 e en xuño 16; fronte a 1 en xaneiro, 2 en febreiro e 4 en marzo. No que levamos de xullo, casáronse 6 parellas. O ano pasado, os meses nos que se celebraron máis vodas foron agosto, con 15, e setembro, con 25.

Respecto aos costumes que se seguen nesta cerimonia civil, moitas parellas escollen traxes nupciais e adornan con frores o Salón de Plenos da Casa Consistorial. Ademais, acompañan con música a celebración levando a grupos concertistas. A banda sonora que escollen para as vodas vai desde as Marchas Nupciais de Häendel ou Mhedhelshon, a composicións de Ennio Morricone para a película “A Misión” ou cancións tradicionais galegas.

Ademais da lectura dos artigos 66, 67 e 68 do Capítulo V do vixente código Civíl, complétase a cerimonia cun poema que recita o edil oficiante. As obras líricas versan sobre a temática do amor e do matrimonio e os autores máis recorridos son Pablo Neruda, Pedro Salinas, Víctor Hugo, Khalil Gibran, Darío Xohán Cabana, Manuel María ou Xulio López Varcárcel.

Como curiosidade, a voda que máis convidados concentrou superou as trescentas persoas, que encheron o Salón de Plenos e os pasillos da Casa Cosistorial.



Compartir: