Cargando....
Concello de Lugo
09/04/20
NOVAS
Escoita esta páxina

O pacto territorial de emprego de Lugo nace coa misión de planificar políticas por valor de 37 millóns de euros en 2008


# Venres, 21/12/2007
A Consellería de Traballo pon en marcha o primeiro dos catro Plans Territoriais de Emprego que funcionarán como experiencias piloto

Un total de 38 concellos da zona centro da provincia tomarán parte no proxecto, que ten como obxectivo incrementar a xestión coordinada dos recursos públicos que se destinan a políticas laborais

O Pacto Territorial de Lugo cubrirá unha poboación de 220.000 persoas, con 89.000 traballadores e menos de 10.000 parados


Santiago, 21 de decembro de 2007.- O conselleiro de Traballo, Ricardo Varela, presidiu esta mañá a sesión constitutiva do Pacto Territorial de Emprego de Lugo, que nace coa misión de planificar políticas laborais por un valor aproximado de 37 millóns de euros en 2008. Alcaldes e representantes municipais dos 38 concellos da zona centro da provincia, xunto con responsables sindicais e empresariais da devandita área, suscribiron hoxe o primeiro dos catro Pactos Territoriais de Emprego que a Consellería de Traballo impulsará de forma inmediata, para posteriormente desenvolver outros 11 ao longo de 2008 e dar así cobertura con esta fórmula participativa a todo o territorio galego.

Na apertura da gran xuntanza que tivo lugar no Centro de Empresas e Innovación participaron o alcalde de Lugo, José López Orozco; o secretario xeral de CCOO de Lugo, Jesús Ángel Castro Baamonde; o secretario xeral de UGT-Galicia de Lugo, Manuel Enrique Chaín Fernández; e o vicepresidente da Confederación de Empresarios de Lugo, David Manuel García Vilela. Todos eles actuaron como portavoces das entidades que dan sustento a este proxecto, que nace do Novo marco de relacións laborais en Galicia: Acordo polo Emprego, froito do proceso de Diálogo Social que coordina a Consellería de Traballo dende novembro de 2005.

O conselleiro de Traballo subliñou que este documento, asinado pola Xunta, a Confederación de Empresarios de Galicia e os sindicatos CCOO de Galicia e UGT-Galicia establece “a necesidade de implicar aos representantes dun ámbito territorial para que aporten os seus coñecementos e experiencias”. Aclarou que un Pacto Territorial é un instrumento de participación da Administración local e dos axentes económicos e sociais nas políticas de emprego da Consellería de Traballo.

Coa posta en marcha deste sistema, argumentou, queda completada unha estrutura de participación que garante a consecución do obxectivo que necesita Galicia: converxer en termos de emprego con Europa. Así pois, os Pactos Territoriais de Emprego complementarán o traballo do Comité Autonómico de Emprego e dos Comités Provinciais de Emprego (foros con participación da Administración e dos axentes sociais que se reúnen con carácter periódico para analizar criterios e medidas de emprego).

Agora os Pactos Territoriais de emprego, dixo Ricardo Varela, supoñen esencialmente “un incremento e unha planificación e xestión coordinada dos recursos públicos que se destinan ao emprego nunha zona”. Subliñou que deben contar cunha suficiente “masa crítica” e aproveitar “ao máximo” a proximidade dos axentes locais. Neste sentido, destacou que o pacto lucense actuará sobre unha poboación dunhas 220.000 persoas, con 89.000 traballadores e traballadoras e menos de 10.000 parados.

Misións do Pacto Territorial de Emprego
O titular de Traballo da Xunta explicou aos alcaldes e representantes sindicais e empresariais asistentes as misións que ten cada Pacto Territorial de Emprego. En primeiro lugar, dixo, debe realizar unha análise das fortalezas, debilidades, oportunidades e ameazas do territorio en cuestión no ámbito do emprego. Posteriormente, definir un plan de emprego “claro, coherente e estratéxico”.

A continuación, proseguíu Varela, o Plan Territorial de Emprego debe mobilizar e desenvolver a capacidade dos axentes que traballan conxuntamente. Por último, puntualizou, debe promover a equidade de xénero no eido local.

Obxectivos estruturais do pacto lucense
Na derradeira parte da súa intervención, o conselleiro de Traballo indicou que pese ao aumento de 7.620 novos afiliados á Seguridade Social nos dous últimos anos (suba dun 9,4%), o Pacto Territorial de Emprego de Lugo conta na actualidade cunha media anual de poboación afiliada de 88.719 persoas. Isto supón, precisou, que soamente 4 de cada 10 persoas están afiliadas.

Por outro lado, analizou, a pesar da redución de 2.462 parados nos últimos dous anos, o conxunto dos concellos que compoñen o pacto contan cunha media anual de paro de 9.473 desempregados rexistrados, dos que un 60% son mulleres e un 25% menores de 30 anos.

Asemade, engadiu, pese ao incremento da contratación indefinida de 2.618 persoas máis con contrato estable (aumento dun 51% en relación con dous anos antes), a porcentaxe de contratos indefinidos sobre o total da contratación é soamente dun 14,9%.

A mellora destas cifras constitúe a principal tarefa estrutural do Pacto Territorial de Emprego de Lugo,que ademais deberá informar o conxunto de solicitudes de políticas activas que se presenten para esta área.

Desenvolvemento desta fórmula en toda Galicia
A posta en marcha dos Pactos Territoriais de Emprego implicará manter activas 15 mesas de Diálogo Social en materia de emprego. A medio prazo, cada un dos pactos contará co seu propio plan de emprego. A xuízo da Consellería de Traballo, isto, sumado á análise da situación laboral provincial e autonómica, suporá unha planificación das necesidades de mercado de traballo de Galicia de maneira ascendente.

A xeralización dos pactos, que iniciarán a súa andaina en Lugo, na Costa da Morte, na comarca de Valdeorras e no Salnés, é un dos instrumentos claves para o cambio do modelo de Servizo Público de Emprego.

Á hora de facer a distribución territorial destas medidas agrupáronse os concellos da Comunidade Autónoma en 15 zonas, en función dos desprazamentos que realizan os traballadores entre un concello e outro para acudir ata o seu centro de traballo. Cinco Pactos Territoriais de Emprego pertencerán á provincia da Coruña (Barbanza, Coruña, Costa da Morte, Ferrol e Santiago), 3 á provincia lucense (Lemos, Lugo e A Mariña), 3 á provincia de Ourense (Limia Ourense e Valdeorras) e, por último, na provincia de Pontevedra desenvolveranse 4 (Deza-Tabeirós, Pontevedra, O Salnés e Vigo).

A Consellería de Traballo contará cun 30% de representatividade de cada pacto, ao igual que os concellos da área correspondente. A representación empresarial e sindical suporá, de xeito equitativo, un 40%. Cada pacto contará cunha entidade xurídica propia, que lle permitirá manter relacións coas diferentes administracións.

Esta iniciativa supón unha aposta clara da Consellería de Traballo pola participación e o diálogo permanente.



Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova