O 010 recibiu máis de 24.100 chamadas no primeiro semestre do ano

# Martes, 23/09/2008

A Concelleira de Servizos Xerais, Luisa Zarzuela, fixo hoxe un balance das solicitudes recibidas no servizo de información municipal 010. Este servizo de atención ao cidadán recibiu no primeiro semestre do ano 24.108 chamadas, 2.276 correos electrónicos e 186 faxes.  Segundo a Concelleira “as previsións son chegar a máis de 100.000 cahamadas ao finalizar o ano contabilizando todas as recibidas dende que foi creado en marzo do 2005”.

Os datos reflictidos no primeiro semetre de 2008 poñen de manifesto un notable incremento do servizo de información 010 con respecto ós anos anteriores, entre o 25 e o 30%. “A media de chamadas diarias é de 230 chegando ás 300 en épocas como o Arde Lucus, o San Froilán ou período de oposicións”, comentou Zarzuela.

A Concelleira explicou que “cobran especial relevancia as consultas de carácter municipal, o 75% das mesmas, mentres que o 15% restante son consultas de tipo extramunicipal coma teléfonos de empresas, horarios e teléfonos doutros organismos públicos, etc.”

As consultas de tipo municipal máis comúns, segundo explicou Luisa Zarzuela, son sobre información para  a realización de calquera trámite municipal,  como a  alta da auga, emprego público, empadroamento, tarxeta transporte urbán etc; así como información  e inscrición  sobre actividades  organizadas polas diferentes áreas do Concello,  información das actividades realizas por entidades colaboradoras e información  extramunicipal  relativa ao municipio de Lugo.

En canto ao servizo de información a través de sms conta con 2.038 usuarios, cunha media diaria de inscrición de 3 persoas, dende que foi creado no ano 2006. Ademais, dende xaneiro de 2007, cando se comezou a xestionar a través do 010 o servizo de intérprete de linguaxe de signos recibíronse un total de 97 solicitudes.

O servizo do 010 contará cunha serie de novidades para este ano como a súa integración coa centraliña de maneira que se aproveiten todas as súas funcionalidades.

Atención ao cidadán
En relación á atención ao público a Concelleira tamén fixo balance da xestión de colas dos servizos do Concello situados na planta baixa do Edificio Administrativo. Segundo indicou Zarzuela, entre xaneiro e setembro atendéronse a un total de 56.250 persoas nos servizos de atención ao cidadán, rexistro, padrón e augas, cunha media de 9 minutos de espera e 4 minutos de atención.

A ventanilla do padrón foi a que máis cidadáns atendeu con 25.770, o que supón un 45,8% do total, seguido polo departamento de rexistro con 18.320 atencións.

A Concelleira suliñou que o número de persoas atendidas presencialmente disminuiu con respecto a anos anteriores xa que os cidadáns están a facer uso das ferramentas que lle permiten relacionarse co Concello dende a súa casa como o portal web e o 010. “Por exemplo, en marzo do 2005 pasaron pola oficina do padrón 4.004 persoas e no mesmo mes do 2008 pasaron 2.783 persoas”.

Consultas á OMIC
Por outra banda, Zarzuela aproveitou para facer balance das consultas e das reclamacións rexistradas na Oficina Municipal do Consumidor (OMIC) entre os meses de xaneiro e agosto de 2008. Os servizos de telefonía móbil e fixa continúan a liderar os motivos de consultas e reclamacións atendidas nesta oficina, con un 41,47%,  debido principalmente aos problemas que atopan os consumidores para darse de baixa nos servizos contratados, para cambiar de operadora ou por desacordos coa facturación.

Outros temas sobre os que se reciben consultas habitualmente son o gas e a electricidade, así como sobre servizos ofertados polos sectores da banca e dos seguros.

Continúase a incrementar as consultas realizadas polos consumidores sobre a compra de vehículos usados, que supoñen o 18,84%  das peticións de información atendidas.

A OMIC tramitou un total de 706 consultas e 292 reclamacións, delas foron 515 consultas e 229 reclamacións sobre servizos e 191 consultas e 63 reclamacións sobre productos.

Respecto ao periodo de rebaixas, non é destacable ningunha reclamación relacionada con produtos como a roupa, o calzado ou electrodomésticos o que indica “que os consumidores cada vez están máis informados e os comerciantes cumpren coa normativa vixente”, manifestou Zarzuela.

Compartir: