Cargando....
Concello de Lugo
29/03/24
NOVAS
Escoita esta páxina

Sánchez Piñón realiza un percorrido polas instalacións do viveiro de empresas do IES Politécnico de Lugo


# Venres, 13/02/2009
Este IES é un dos seis centros galegos que participan no proxecto pioneiro FP Emprende, que ten por finalidade axudar ao alumnado de FP a emprender a través de viveiros de empresas

A conselleira de Educación salientou que esta iniciativa contribúe a fomentar o autoemprego por parte do alumnado

A conselleira de Educación e Ordenación Universitaria, Laura Sánchez Piñón, realizou unha visita esta mañá ao Instituto de Educación Secundaria (IES) Politécnico de Lugo, un dos seis centros galegos que están a participar no proxecto FP Emprende, unha iniciativa pioneira que ten por obxectivo axudar ao alumnado de Formación Profesional a crear a súa empresa desde os centros educativos, a través de viveiros de empresas.

Sánchez Piñón, que estivo acompañada polo alcalde de Lugo, José López Orozco, e polo director xeral de Formación Profesional e Ensinanzas Especiais, Antonio Vázquez, tivo a oportunidade de coñecer as instalacións deste viveiro, que conta con tres espazos habilitados para este fin. O viveiro consiste nun local acondicionado para a actividade empresarial que se cede, de xeito gratuíto e durante dous anos, ás persoas participantes no proxecto para que poñan en funcionamento o seu proxecto empresarial.

Deste xeito, Laura Sánchez Piñón afirmou que a Consellería de Educación acondicionou os espazos dos centros que desenvolven os viveiros, dotándoos de recursos suficientes para abordar o proxecto empresarial, como ordenadores, Internet, teléfono e fax, impresora e fotocopiadora. Así mesmo, os emprendedores poden empregar os recursos existentes noutras dependencias, como obradoiros ou laboratorios. Estes viveiros contan ademais cun titor, que acompaña aos emprendedores en todo o proceso de creación da empresa, así como co asesoramento do IGAPE e BIC Galicia.

A máxima responsable do departamento educativo galego afirmou que esta iniciativa ten por obxectivo "fomentar o autoemprego" por parte do alumnado, e explicou que se dirixe ao alumnado de FP maior de idade que curse o último ano dun ciclo formativo, así como a persoas tituladas en FP nos dous últimos anos.

Pola súa banda, a directora do centro, Mónica Ramos, salientou que un alumno do centro xa puxo en marcha o seu proxecto empresarial, baseado no aproveitamento do refugallo forestal para producir enerxías limpas; e explicou que outros estudantes están traballando en ideas para futuros proxectos.

Unha iniciativa enmarcada no proxecto FP Plus
Ademais de no IES Politécnico de Lugo, o proxecto FP Emprende desenvólvese nos Institutos de Educación Secundaria (IES) Manuel Antonio de Vigo, Luís Seoane de Pontevedra, e Portovello de Ourense; así como nos Centros Integrados de Formación Profesional (CIFP) Rodolfo Ucha Piñeiro de Ferrol e Ánxel Casal de A Coruña.

FP Emprende enmárcase no proxecto FP Plus, unha iniciativa pioneira que se iniciou o curso pasado, e que ten por obxectivo fomentar iniciativas emprendedoras entre o alumnado de Formación Profesional.

O proxecto consta de catro programas: o FP Idea, FP Avanza, FP Emprende e FP Simula. O primeiro premia o mellor proxecto empresarial ou a mellor idea innovadora do alumando destas ensinanzas, mentres que FP Avanza pretende darlle ao alumnado de FP unha cualificación práctica relacionada co proceso de creación de empresas mediante un seminario e un circuíto de visitas guiadas a empresas e viveiros de creación de empresas, o que permitirá ao alumnado o coñecemento da experiencia de persoas emprendedoras vinculadas ao seu sector de interese.

Por último, o proxecto FP Simula púxose en marcha de xeito experimental en 6 centros galegos no curso 2007-2008, entre eles o IES A Piringalla de Lugo. Esta iniciativa consiste na constitución dunha empresa virtual nun centro educativo, de xeito que o alumnado participa en primeira persoa no proceso de creación da mesma, e pasa a ocupar os diversos postos de traballo de xeito rotatorio.




Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova