Lugo Cultural inaugura o venres a mostra Vermellas en homenaxe ás mulleres represaliadas na Guerra Civil

# Luns, 02/03/2009
A exposición ‘Vermellas’, que rende homenaxe ás mulleres que sufriron represalias en Galicia a raíz da Guerra Civil, inaugúrase este venres no Campus de Lugo enmarcada no Convenio Lugo Cultural. Na apertura actuarán os grupos Grex, Snail, Basi e Iván y Josito, nun concerto que será gratuíto e no que presentarán o álbum ‘Na memoria’.

A mostra, que se emprazará na Sala Isaac Díaz Pardo da Facultade de Veterinaria, está organizada pola Vicerreitoría de Cultura e recolle o traballo de investigación dos profesores Carmen Blanco e Claudio Rodríguez Fer sobre diferentes figuras femininas e material gráfico cedido polo Proxecto Interuniversitario ‘As vítimas, os lugares, os nomes, as voces’. A exposición conta ademais con gravados de Sara Lamas.

O Convenio Lugo Cultural está integrado pola USC, o Concello de Lugo, a Consellaría de Cultura, a Deputación Provincial e a Fundación Caixa Galicia.


Compartir: