Cargando....
Concello de Lugo
29/03/24
NOVAS
Escoita esta páxina

El Alcalde de Ourense realizará este año la Ofrenda del Reino de Galicia el día 21 de junio


# Martes, 16/06/2009
O Concello de Lugo está a ultimar os preparativos para esta celebración que ten 340 anos de historia

O Concello de Lugo ten xa preparados os actos de celebración da Ofrenda do Antigo Reino de Galicia ao Santísimo Sacramento, que este ano será o domingo 21 de xuño.

Os actos previos comezarán o sábado pola tarde coas vésperas de Corpus ás 20:00 horas na Catedral de Lugo, onde estarán representantes da Corporación Municipal de Lugo e Ourense.

O día da Ofrenda será o domingo 21 de xuño e comezará ás 11:20 coa recepción de autoridades na Casa Consistorial. Está previsto que asistan representantes das 7 Capitais do antigo Reino de Galicia, das 4 Deputacións provinciais, do Exército, do Parlamento e do Senado.

Ás 11:30 será a sinatura no libro de Ouro por parte do Delegado Rexio, que nesta ocasión é o alcalde de Ourense, Francisco Rodríguez Fernández. Ás 12:00 comeza a Misa deste tradicional acto que se ven celebrando en Lugo dende o ano 1669 por parte dos representantes das sete capitais do antigo Reino de Galicia. Ao longo da Misa ten lugar a lectura da tradicional Ofrenda por parte do Delegado Rexio. Posteriormente haberá unha procesión pola Praza Maior na que participa a Banda Municipal de Lugo e Ourense, para voltar as autoridades de novo á Catedral e facer entrega da Ofrenda.

Este acto realízase só en Lugo, pero cada ano unha cidade é a encargada desta ofrenda na que participan as sete antigas capitais: Lugo, A Coruña, Betanzos, Santiago de Compostela, Mondoñedo, Ourense e Tui.

Publicación de Fernando de Casas Nóvoa en Lugo

O Concello de Lugo publica nesta ocasión o libro Fernando de Casas Nóvoa en Lugo, de Darío Xohán Cabana no que presenta a un mozo chamado Fernando de Casas chegando a Lugo pola ponte sobre o río Miño, que describe a pequena cidade coa que se encontrou, e que relata as obras do claustro e da capela da Virxe dos Ollos Grandes procurando sempre o detalle cálido e vital dos vellos documentos.

Esta breve obra é tamén, dende o punto de vista da edición –dirixida polo propio Darío Xohán Cabana–, un fermoso e elegante libro, deseñado e maquetado pola empresa lucense Tatata, que será entregado o día da Ofrenda como agasallo institucional aos representantes das outras capitais históricas galegas con motivo da Ofrenda do Antigo Reino de Galicia ao Santísimo Sacramento.

O arquitecto compostelán Fernando de Casas Nóvoa construíu en Lugo, entre 1708 e 1736, dúas obras de gran importancia: o claustro da catedral e a capela da Virxe dos Ollos Grandes, considerada unha das obras mestras do barroco galego. A súa influencia na arquitectura da nosa cidade foi moi grande, pois nos mestres de obras locais do século XVIII fíxose sentir o seu maxisterio, e tamén o do seu aparellador e discípulo predilecto Lucas Ferro Caaveiro, autor entre outras obras lucenses da magnífica Casa do Concello.

Fernando de Casas, creador tamén da maxestosa fachada do Obradoiro da catedral compostelá, é xeralmente considerado o máis grande arquitecto do barroco galego. O Concello de Lugo acaba de dedicarlle a praza que ata agora se chamaba do Alférez Provisional, contigua á capela da Virxe dos Ollos Grandes, cumprindo así dous obxectivos: aplicar a filosofía da Lei de Memoria Histórica suprimindo da toponimia urbana un nome vinculado á rebelión militar de 1936 e á guerra civil española, e honrando un dos máis grandes artistas da historia de Galicia, situándoo no lugar máis axeitado posible: xusto ao carón da súa máis fermosa obra lucense.




Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova