Cargando....
Concello de Lugo
01/12/20
NOVAS
Escoita esta páxina

O Alcalde de Lugo subliña que os preto de 100 millóns de euros investidos nas obras dos barrios dan conta da transformación dunha cidade "na que todos teñen os mesmos dereitos"


# Mércores, 15/07/2009
* Destaca que as obras “contribuíron na creación e sostemento do emprego e na construción dunha cidade máis saudable e sostible

Imaxe Asociada

* Explica que o leit motiv que rexe a acción de Goberno do Concello establece que “independentemente do barrio onde se viva haxa igualdade de dereitos”

* “A partir de agora Lugo camiñará nunha nova etapa na que relanzar a cidade”, expuxo


O Alcalde de Lugo, José López Orozco, acompañado polo Concelleiro de Infraestruturas, José Piñeiro, deu conta hoxe da contía que leva investida o Concello nas obras dos barrios da cidade desde o ano 1999, ano de chegada ao Goberno do Alcalde. Así, López Orozco subliñou que os preto de 100 millóns de euros investidos nas obras dos barrios - 98.664.805,59 euros- dan conta da transformación dunha cidade “na que todos os veciños e veciñas teñen os mesmos dereitos, independentemente de onde vivan”.

Na súa intervención, López Orozco expuxo que en 30 anos de Gobernos democráticos, os 10 anos que leva no Goberno Local a cidade viviu o maior impulso no investimento nos barrios, uns datos que o Partido Popular pode comparar co seu investimento tras ter estado no Goberno o dobre de tempo.

Trátase, tal e como explicou López Orozco, de actuacións levadas a cabo no centro e nos barrios da cidade, sen contar a zona rural, nas que se acometeron obras. “Non hai ningún barrio no que non se actuara; non faltaron actuacións en rúas, iluminación, pavimentos”, destacou o Alcalde.

O importante volume de investimento, posible grazas á colaboración establecida entre o Concello e outras administración como a Xunta ou o Estado a través do convenio con Fomento e o Plan E, permitiu “darlle unha nova imaxe á cidade”. Así mesmo, López Orozco salientou que as obras “contribuíron na creación e sostemento do emprego e na construción dunha cidade máis saudable e sostible”.

Igualdade de dereitos
O investimento en obras realizado polo Concello de Lugo ao longo destes dez anos, demostra, tal e como sinalou o Alcalde, a diferencia existente entre un goberno progresista e un que non o é. Así, referiuse ao leit motiv que rexe a acción de Goberno do Concello que establece que independentemente do barrio onde se viva haxa igualdade de dereitos.

Neste sentido, o Alcalde de Lugo destacou dúas liñas de actuación. A primeira delas centrouse en garantir a existencia dos servizos básicos urbanos. Agora, explicou, Lugo camiñará nunha nova etapa na que relanzar a cidade: os barrios e o centro, así como a zona rural.

Para chegar a esta segunda fase que o Concello está xa a acometer, foron precisos 10 anos de “traballo intenso, responsable e organizado” por parte da Administración Local, un traballo ao que só no apartado se destinou un investimento de preto de 100 millóns de euros.

As obras, entre outras actuacións levadas a cabo polo Concello de Lugo, produciron unha transformación dunha cidade que é pequena pero que se pode comparar en servizos con calquera outra cidade de Galicia e de España.

“O cambio levado a cabo na cidade sentou as bases que permitirán seguir mellorando Lugo”, incidiu.

Actuacións de futuro
O Alcalde de Lugo referiuse, así mesmo, as actuacións de futuro en materia de obras nas que o Concello seguirá traballando. Neste sentido, expuxo que se seguirá adiante coa renovación da iluminación da cidade. Así mesmo, falou da última fase do Plan Paradai e no seguimento continuado aos barrios. “Investiremos alí onde haxa máis necesidade para que a cidade siga tendo futuro”, salientou.


Escoitar audio:
Escoitar audio:


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova