Uns 70 deportistas participarán no X Gran Premio Ciclista San Froilán
# Mércores, 30/09/2009
O evento terá lugar o sábado 3 de outubro na Avenida de Ramón Ferreiro
O Concelleiro de Deportes, José Manuel Díaz Grandío, e os directivos do Club Ciclista Cidade de Lugo, Eugenio Paz e José María Seijas, presentaron esta mañá o X Gran Premio Ciclista San Froilán que terá lugar a partir das 17:00 horas do vindeiro sábado, 3 de outubro, na Avenida de Ramón Ferreiro.
Segundo anunciaron os organizadores agárdase a participación duns 70 deportistas nesta proba que fará disfrutar do ciclismo de moi alto nivel deportivo ao público asistente.
Os deportistas participantes competirán nas categorías élite e sub 23 que este ano como novidade contarán con catro probas distintas:
- Fondo (20 voltas).
- Contrarreloxo por equipos
- Sprint
- Eliminación
Pasarán a formar parte do medalleiro aqueles que obteñan o maior número de puntos nas probas.
Ademais, nesta xornada ciclista haberá na Praza de Ramón Ferreiro de forma paralela á competición dos maiores, unha ginkana destinada aos máis pequenos co fin de achegar o ciclismo a toda a poboación pero especialmente á mocidade. Todos os que participen nesta ginkana recibirán un agasallo como recordo.
Compartir: