Cargando....
Concello de Lugo
04/06/20
NOVAS
Escoita esta páxina

O Concello de Lugo fomenta o hábito da lectura entre os máis pequenos con novas sesións de animación e contacontos


# Xoves, 11/03/2010
O programa desenvolverase entre o 11 de marzo e o 9 de decembro na Biblioteca Municipal

Imaxe Asociada
O Concello de Lugo pon en marcha un novo programa de animación á lectura para os máis pequenos na Biblioteca Municipal. A Concelleira de Cultura e Turismo, Concepción Burgo, presentou as actividades que comezarán hoxe xoves 11 de marzo e que van dirixidas a nenos de entre 3 e 12 anos e unha delas a bebés de 0 a 3 anos. As sesións terán lugar os xoves, ás 19:00 horas.

Con este programa trátase de impulsar a utilización da Biblioteca por parte dos máis cativos e cumprir así cos compromisos do Goberno Local para que se converta nun centro cultural de referencia. É unha maneira de que os máis pequenos se acheguen á cultura e, en especial, aos libros.

O programa de animación á lectura e contacontos contempla numerosas actividades entre o 11 de marzo e o 9 de decembro nas que contacontos achegarán ós rapaces ó mundo da fantasía.

O que máis anima ao Concello de Lugo a continuar co programa é que, os participantes máis novos mostran un especial interese pola actividade, cunha fidelidade na súa asistencia dende o primeiro ao último día e unha participación activa nas sesións. Ademais, estes rapaces e rapazas establecen deste xeito o seu primeiro contacto coa biblioteca municipal, familiarízanse co espazo, coas súas normas e acceden aos servizos da biblioteca ao darse de alta como socios e solicitar os seus primeiros préstamos.

Programa:

- 11 de marzo ás 19.00 h. Contacontos. INÉS CUADRADO. “Sombras e cores”. Animación á lectura a través de relatos de contos e lendas con sombras chinesas, coa participación dos cativos.

- 18 de marzo ás 19.00 h. Contacontos. TARABELOS. “A qué cheiran os contos?” Contacontos con narración ilustrada, utilizando monicreques, teatro de sombras, máscaras, escenarios e outras técnicas teatrais.

-25 de marzo ás 19.00 h. Contacontos. COMPAÑÍA DO TRINKE. “A viaxe espacial dos ratos de biblioteca”. Os ratos da biblioteca contan a aventura da que acaban de regresar e lémbralles aos nenos as normas de funcionamento da Biblioteca.

- 8 de abril ás 19.00 h. Contacontos. OS CONTOS DE PABLÍSIMO. “Os contos de Pablísimo”. O contador Pablísimo narrará co seu peculiar estilo diversas historias acompañado de obxectos, sons e xestos.

- 22 de abril ás 18.30 h. Obradoiro. BABALUVA TEATRO. “Contaconto con monicreques”. Para nenos maiores de 5 anos. Aforo limitado a 20 participantes.
Obradoiro coordinado por unha monitora de teatro e outra de artes plásticas co obxectivo de que os participantes elaboren un pequeno espectáculo de monicreques.

- 29 de abril ás 19.00 h. Contacontos. FÁTIMA FERNÁNDEZ. “Un soño de contos”. Contos interactivos adaptados ao público, buscando a máxima participación

- 6 de maio ás 19.00 h. Contacontos. FRAN INSUA. “Cómo dar a volta ao mundo sen saír do teu barrio”. O contador explicará cómo hai uns días coñeceu a unha rapaza chamada Madlenka que lle contou cómo dar a volta ao mundo sen saír do barrio.

- 20 de maio ás 19.00 h. Obradoiro. TEATRO BURATINI. “A biblioteca imaxinaria”. Para nenos e nenas maiores de 8 anos. Aforo limitado a 20 participantes. Obradoiro de creación literaria no que se utilizarán diversas técnicas para conseguir que cada neno participante cree a liña argumental da súas propia historia ou conto: o cofre do tesouro, o binomio fantástico,…

- 27 de maio ás 18.00 h. Contacontos. CHARO PITA. “Fábulas no berce”. Para nenos e nenas de 0 a 3 anos acompañados polos seus pais. Aforo limitado a 20 participantes. A través de relatos sinxelos, ritmos e cancións introducirase aos máis pequenos no universo das palabras.

- 3 de xuño ás 19.00 h. Contacontos. MIGALLAS TEATRO. “Conta Contos”. Os contos tradicionais ou de creación de María dos Contos tratan cuestións moi próximas aos nenas e nenos e teñen como finalidade, ademais de entreter e divertir, achegar elementos importantes da nosa cultura.

- 17 de xuño ás 18.30 h. Obradoiro. JACOBO FERNÁNDEZ SERRANO. “Obradoiro de banda deseñada”. Para nenos maiores de 6 anos. Aforo limitado a 20 participantes. Neste obradoiro repasaranse algúns dos elementos da linguaxe do “cómic” e poñeranse en práctica eses elementos debuxando unha páxina.

- 24 de xuño ás 18.30 h. Obradoiro. MARISA IRIMIA co músico JUAN CARLOS VÁZQUEZ “Obradoiro conto-musical”. Para nenos maiores de 7 anos. Aforo limitado a 30 participantes. Empregaranse recursos plástico-sonoros para a elaboración dun sinxelo conto con música.

- 30 de setembro ás 19.00 h. Contacontos. FÁTIMA FERNÁNDEZ. “Contos de galiñas e galos”. Narración dun conto seguido dunha actividade relacionada con el.

- 14 de outubro ás 19.00 h. Contacontos. SANTI PREGO. “Contos da lúa”. Empregaranse bonecos para contar os contos: en total dous ou tres con participación dos nenos e dous ou tres contos narrados.

- 21 de outubro ás 19.00 h. Obradoiro. RAMÓN CARIDE OGANDO. “Cómo se escribe un libro”. Para nenos maiores de 7 anos. Aforo limitado a 20 participantes. Neste obradoiro explícase de xeito práctico o proceso creativo dun libro de ficción, de prosa ou poesía, procurando que os participantes elaboren os seus propios textos partindo da idea inicial, a documentación, o plan de traballo, a redacción, os borradores, a corrección…

- 28 de outubro ás 19.00 h. Contacontos. PAVIS-PAVOS. “Sesión de contacontos para a infancia”. Narración de contos tratando de recuperar a oralidade e a figura do contador tradicional e incluíndo tamén contos de creación propia.

- 11 de novembro ás 19.00 h. Contacontos. FÁTIMA FERNÁNDEZ. “O segredo do rei”
Contos interactivos adaptados ao público, buscando a máxima participación.

-18 de novembro ás 19.00 h. Obradoiro. SANTIAGO GUTIÉRREZ. “Taller de debuxo e cómic”. Neste obradoiro de debuxo indicarase cómo ilustrar un conto infantil ou un cómic: guión, composición das páxinas, planos, onomatopeas, narrativa secuencial… Faranse divertidos exercicios para os rapaces.

- 25 de novembro ás 19.00 h. Contacontos. AS MARÍAS. “A amizade é o mellor tesouro”. A historia deste conto ocorre nun bosque onde todos os animais son bos amigos e compañeiros ata que aparecen a envexa e a vergoña…

- 2 de decembro ás 19.00 h. Obradoiro. XOÁN NEIRA LÓPEZ. “Iniciación á poesía”. Para nenos maiores de 7 anos. Aforo limitado a 30 participantes. O obradoiro constará dunha charla de iniciación á poesía no que se farán xogos lingüísticos, acrósticos, caligramas, palíndromos, anagramas e se xogará co ritmo e a rima na poesía.

- 9 de decembro ás 18.30 h. Obradoiro. FÁTIMA FERNÁNDEZ. “O desexo da lúa”. Para nenos maiores de 7 anos. Aforo limitado a 30 participantes. A partir dun conto, cada neno realizará unha páxina do libro dos desexos da lúa.

Estas actividades deseñáronse pensando en ofrecer aos lucenses un tempo de lecer en familia.



Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova