O Festival de Música Cidade de Lugo. XXXVIII Semana do Corpus comeza o vindeiro sábado 17 de abril

A próxima semana, o sábado 17 de abril, comeza a trixésimo oitava edición do decano dos festivais galegos de música clásica: o Festival de Música Cidade de Lugo (tradicionalmente coñecido como Semana do Corpus) que está organizado pola Concellería de Cultura e Turismo.

Durante mes e medio, ata o 1 de xuño, encherá de música a cidade cos vinteún concertos marcados pola súa calidade e a variedade. Terán como escenario diferentes lugares como o Círculo das Artes, o Conservatorio de Música, a Igrexa de San Pedro e a sede de Fundación Caixa Galicia.

Chopin, Schumann ou Pergolesi son algúns dos máis senlleiros compositores cuxas efemérides o mundo musical celebrará ao longo deste ano 2010 e aos que o festival prestará unha especial atención.

Precisamente o Festival de Música Cidade de Lugo arranca cun concerto no Círculo das Artes dedicado a Pergolesi e os seus contemporáneos protagonizado polo prestixioso grupo italiano La Risonanza e o seu director Fabio Bonizzoni, que regresan á cidade tralo éxito acadado o pasado ano co oratorio de Haendel Il trionfo del Tempo e del Disinganno. Este concerto inaugural tamén suporá o debut na cidade da magnífica mezzosoprano italiana Romina Basso para cantar un programa conformado por obras de Antonio Caldara, Giovanni Battista Bononcini, Francesco Durante, Domenico Scarlatti e Giovanni Battista Pergolesi.

A entrada, coma sempre no festival, é libre ata completar o aforo do local.

O festival presentará, ademais, unha programación de alta calidade e interese. De gran acontecemento debe calificarse tamén a presentación no festival da mezzosoprano sueca Ann Hallenberg, do director norteamericano (italiano de adopción) Alan Curtis e da súa orquestra Il Complesso Barocco, para interpretar unha coidada, fermosísima e esixente selección de arias de ópera de Haendel nun concerto organizado en colaboración coa S.A. de Xestión do Plan Xacobeo.

O interese da ampla oferta lírica do festival está garantida pola calidade e reputación dos cantantes e a salientable variedade dos programas que inclúen ópera, música antiga, lied e canción, música sacra, musical, etc.


Nas últimas tres edicións do festival deseñouse o “Corpus dos nenos”, un ciclo de tres concertos familiares que se celebrarán os sábados no Círculo das Artes. Títeres e música únense nos espectáculos titulados Hansel e Gretel (a cargo do quinteto de ventos Pentafonía e da compañía Seisdedos) e A caixa de música (Viravolta títeres). Co concerto Kashmir rumbo a Lugo, a agrupación Evo propón a historia dun rapaz que viaxa nun baúl cheo de instrumentos musicais, das máis variadas procedencias, que presentará aos asistentes. A organización é consciente da utilidade e necesidade da presenza da música na súa formación, polo que hai que facilitar a accesibilidade dos nenos á música, que sen dúbida debe constituír un piar fundamental do seu futuro, da súa felicidade.

Programa do Festival de Música Cidade de Lugo 2010

Resumo do Programa do Festival de Música Cidade de Lugo 2010