O Goberno Local defende no pleno do Concello a gratuidade do aparcamento no Hospital
# Luns, 03/05/2010
O Goberno do Concello de Lugo reclama a gratuidade do aparcamento no novo Hospital porque tanto a infraestrutura sanitaria como o aparcamento “construíronse en terreos doados polo pobo de Lugo”, segundo salientou o voceiro do equipo de Goberno, José Rábade, no pleno municipal.
Rábade considera inxusto que os veciños teñan que pagar por estacionar o seus vehículos cando acudan ó hospital que é un servizo esencial. “A xente non vai aparcar alí para facer a compra” ironizou o voceiro do equipo de Goberno e Concelleiro de Tráfico.
Tamén respondeu ós argumentos da Consellería de Sanidade sobre a existencia doutros hospitais galegos nos que se cobra por aparcar e lembroulle á Consellería que no Complexo hospitalario universitario de Santiago hai 1.000 prazas de estacionamento gratuíto.
Ademais o voceiro do equipo de Goberno reiterou que o Concello non vai poñer o sistema ORA nas proximidades do novo Hospital, nin nas vías de acceso nin nas zonas perimetrais, como xa anunciou o Concello logo de que a Conselleira de Sanidade, Pilar Farjas, recoñecera no Parlamento que a súa intención é cobrar por aparcar no parking do Hospital.
Contra o traslado das especialidades
Na sesión plenaria, o Goberno local tamén amosou a súa oposición a outro proxecto de Sanidade, o traslado do Centro de Especialidades da rúa Ferrol, unha medida que suporía recortar servizos no centro coa conseguinte repercusión económica para establecementos comerciais e de hostalería da zona.
Compartir: