Cargando....
Concello de Lugo
29/03/24
NOVAS
Escoita esta páxina

O Concello de Lugo felicita a Radio Lugo polo seu 75 aniversario


# Mércores, 27/10/2010
O Alcalde de Lugo, José López Orozco, fixo entrega dunha placa conmemorativa ao Presidente do Grupo Radio Lugo pola celebración do 75 aniversario da emisora lucense

Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
Logo do acto celebrado no Concello descubriuse a placa na rúa que leva o nome do fundador de Radio Lugo, Julio Beberide


O Alcalde, José López Orozco, en representación do Concello de Lugo, fixo entrega ao Presidente do Grupo Radio Lugo, Julio Beberide Martínez, dunha placa conmemorativa do 75 aniversario que está a celebrar a emisora lucense, que comezaba a súa andadura en Lugo no ano 1935.

O acto comezou as 12.00 horas cunha recepción por parte do Alcalde e membros da Corporación Municipal a Julio Beberide, Mª Carmen Gigosos, Iván Beberide Gigosos, Olga Beberide Gigosos e Victor Soto López. Posteriormente, o Presidente do Grupo Radio Lugo, Julio Beberide, asinou no Libro de Honra do Concello.

Xa no Salón de Plenos, e acompañado por membros da Corporación Municipal, o acto estivo presidido polo Alcalde, José López Orozco, o Presidente da Deputación de Lugo, José Ramón Gómez Besteiro, o Presidente do Grupo Radio Lugo, Julio Beberide Martínez, e a Directora do Grupo Radio Lugo, Olga Beberide Gigosos.

Tras o saúdo e benvida, o Alcalde fixo entrega dunha Placa Conmemorativa do 75 aniversario a Julio Beberide, e felicitou a Radio Lugo, sinalando o “gran respecto e cariño dos lucenses cara un medio que leva 75 anos acompañando, como un veciño máis, durante o día e en moitos casos durante a noite, ofrecendo oportunidades de coñecer o que acontece no mundo”. López Orozco destacou que é un proxecto con continuidade, e animou a emisora lucense a seguir levando o nome de Lugo ben alto, “como onte, coa emisión do programa Hoy por Hoy, que se retransmitiu en directo dende o Pazo de San Marcos, e que achegou o nome de Lugo a toda España”.

Pola súa banda, o Presidente do Grupo Radio Lugo, Julio Beberide Martínez, fixo un pequeno e emotivo percorrido polos 75 anos de historia da emisora.

Tralo acto no Concello, as autoridades e os directivos de Radio Lugo desprazáronse ata a praza do Castiñeiro onde se descubriu a placa da rúa que leva o nome do fundador de Radio Lugo, Ramón Beberide.

Alí o Alcalde salientou que tamén o acordo do Concello de adicarlle unha rúa da cidade ó fundador de Radio Lugo foi adoptado por unanimidade da Corporación Municipal.
Mentres, o Presidente do Grupo Radio Lugo explicou que tal día como hoxe, hai 75 anos, o seu pai fundou esta veterana emisora de radio da que destacou o seu compromiso con Lugo, que manteñen na actualidade e seguirán sostendo as novas xeracións que están á fronte da emisora.

Ó acto tamén asistiron o Presidente da Deputación, José Ramón Gómez Besteiro, o Subdelegado do Goberno, José Vázquez Portomeñe, membros do Goberno local e dos grupos políticos do Concello de Lugo, membros da familia Beberide e traballadores de Radio Lugo.



Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova