O Alcalde de Lugo en funcións, José López Orozco, recibiu esta mañá, no Salón de Plenos da Casa Consistorial, a un grupo de 22 estudantes polacos, acompañados por dúas profesoras e un monitor, que se atopan de intercambio cos alumnos e alumnas do Colexio Galén.

Os rapaces e rapazas, procedentes de Zarwiercie, ao sur de Cracovia, chegaron onte a Lugo, e permanecerán na cidade ata o vindeiro día 07 de xuño. Durante a súa estancia, os estudantes coñecerán a cidade de Lugo, farán unha ruta de senderismo polo Rato e o Miño, visitarán o Domus, farán un percorrido do camiño de Santiago e realizarán actividades co resto do alumnado do Colexio Galén.

O Alcalde de Lugo en funcións, José López Orozco, entregoulles aos docentes un exemplar en inglés do Libro da Muralla de Lugo para o seu instituto, e lles desexou aos estudantes e os profesores unha feliz estancia na cidade.