Cargando....
Concello de Lugo
28/03/24
NOVAS
Escoita esta páxina

O Alcalde de Lugo e o arqueólogo e escritor Antonio Rodríguez Colmenero presentaron hoxe o libro "Lucus Augusti"


# Xoves, 23/06/2011
O libro, enmarcado no programa conmemorativo Lugo10, foi editado en tres idiomas: galego, castelán e inglés, e servirá como libro de protocolo do Concello

Imaxe Asociada Imaxe Asociada
O proxecto conta cunha subvención do Ministerio de Cultura de 75.000 euros

O Alcalde de Lugo, José López Orozco, e o profesor, arqueólogo e escritor, Antonio Rodríguez Colmenero, presentaron hoxe, no Salón de Plenos do Concello de Lugo, o libro “Lucus Augusti. A Cidade Romano-Xermánica da Fisterra Ibérica. Xénese e Evolución Histórica (14 a.C - 711 d.C)”.

No ano 2004 o Concello de Lugo promoveu a edición dun importante libro colectivo titulado “A Muralla Romana de Lugo, Patrimonio dá Humanidade”, que se publicou en galego, castelán e inglés. O volume, de 320 páxinas en folio e con abundante ilustración, recollía traballos históricos e arqueolóxicos sobre os diversos aspectos do monumento e da cidade. A obra tivo sen dúbida unha grande importancia no mundo científico, pero o seu propio carácter limita a súa utilidade a un público composto fundamentalmente de especialistas ou persoas cun alto nivel de interese e formación.

Así, foi necesaria, polo tanto, a publicación dunha obra que, mantendo o rigor científico imprescindible, se preste á lectura non só do especialista, senón tamén dun público culto máis amplo, conxugando ese rigor cun estilo expositivo claro, atractivo, e, mesmo se se quere, apaixonante, que poderiamos definir como de alta divulgación. Ademais, dende entón produciuse un considerable avance dos estudos sobre Lugo e a súa muralla, a consecuencia das recentes escavacións e achados, así como da teorización histórica, plasmada fundamentalmente no Congreso Internacional Murallas de Cidades romanas no Occidente do Imperio. Lvcvs Avgvsti como paradigma, que se celebrou en Lugo entre o 26 e o 29 de novembro de 2005, e cuxas actas foron publicadas, con ese mesmo título, en marzo de 2007.

Un dos editores das actas, e relator destacado no Congreso, foi o Profesor Doutor D. Antonio Rodríguez Colmenero, tal vez o maior especialista galego no mundo romano, catedrático en Historia Antiga da Universidade de Santiago de Compostela e membro de número da Real Academia Galega de Belas Artes "Nosa Señora do Rosario", autor dunhas vinte monografías e máis de cen artigos en revistas científicas. A parte da súa grande altura científica, o Dr. Rodríguez Colmenero é dono dun estilo literario elegante e vigoroso, capaz de presentar dun modo extraordinariamente atractivo e apaixonante a información histórica, que o converte na persoa máis idónea para escribir unha obra como a antes aludida, para a cal conta, ademais, coa vantaxe de vivir en Lugo e de ser o mestre recoñecido dos traballos arqueolóxicos lucenses das últimas décadas.

No acto de presentación, Antonio Rodríguez Colmenero destacou “a necesidade de que o público entenda o que foi o Lugo romano dun xeito sinxelo, popular ao mesmo tempo que científico, pedagóxico e se é posible, ameno”.

Pola súa banda, o Alcalde destacou que “Lucus Augusti. A Cidade Romano-Xermánica da Fisterra Ibérica. Xénese e Evolución Histórica (14 a.C. - 711 d.C.)”, “é unha obra que lles relata aos lucenses, e a todos aqueles que nos visiten, a historia dun xeito entretido e dinámico coa rigorosidade dun libro de historia, e que ademais servirá de libro de protocolo para o Concello de Lugo”.

O libro está publicado en tres idiomas: galego (edición orixinal), castelán e inglés, cunha tirada de 3.000 exemplares. Trátase dunha edición de nobres características materiais e encadernación en pasta dura. É unha obra con ampla ilustración, consistente en fotografías artísticas e arqueolóxicas, debuxos, infografías e planos, na súa maioría procedentes do Servizo Municipal de Arqueoloxía, que conta cun importante fondo, e outros de nova elaboración. O proxecto conta cunha subvención do Ministerio de Cultura de 75.000 euros.



Escoitar audio:


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova