Demostracións ao vivo de ferreiros, oleiros, torneiros, palilleiras e tecelás abren a Mostra de Vellos Oficios, pola que pasarán sesenta artesáns galegos todas as fins de semana ata setembro

# Sábado, 16/07/2011
Os artesáns montaron os seus talleres durante todo o día no fondo da Praza Maior e houbo obradoiros para nenos e explicacións dos distintos oficios.

A área de Cultura e Turismo busca con esta actividade encher de vida as rúas de Lugo durante os meses do verán e ofrecer un atractivo máis tanto aos lugueses como aos turistas que se achegan á cidade nesta época.

A concelleira Paz Abraira destaca que esta iniciativa permite recuperar oficios tradicionais, apoiar a labor dos artesáns e fomentar o emprego neste sector.

Arturo Iglesias, un torneiro de Grandas de Salime que traballa con torno tradicional de madeira; Oliverio Álvarez e o seu fillo, ferreiros na Fonsagrada; Julio e José, oleiros de Buño; Concha Arroyo, unha palilleira de Lugo; e Luisa Estévez, unha tecelá de Cambre abriron hoxe a Mostra de Vellos Oficios, que traerá á cidade de Lugo dende hoxe e ata o 11 de setembro todas as fins de semana a 60 artesáns procedentes de toda Galiza.

Na xornada inaugural, celebrada esta mañá, a concelleira nacionalista Paz Abraira, destacou que con esta mostra a área de Cultura e Turismo pretende encher de actividade as rúas de Lugo durante todo o verán tanto para o disfrute tanto dos lugueses e luguesas como dos turistas que visitan a cidade e, ao mesmo tempo, recuperar e apoiar aos artesáns que seguen empregando os métodos tradicionais de traballo para que non se perdan.

Os artesáns montaron os seus talleres no fondo da Praza Maior, igual que farán todos os sábados e domingos ata setembro, en horario de mañá e tarde (de 11:00 a 14:30 horas e de 17:00 a 21:30). Todos os artesáns traballan á vista do público e ademais das demostracións ao vivo tamén venden os produtos que elaboran. Haberá tamén talleres nos que poderán participar os nenos e explicacións das distintas técnicas empregadas.

Hoxe, por exemplo, durante todo o día Arturo Iglesias explicou ao numeroso público asistente que pasou pola mostra durante todo o día o curioso sistema do torno tradicional de media volta empregado en Grandas. Igual que Julio e José, oleiros de buño, que fixeron un obradoiro para os máis pequenos, onde lles ensinaban o oficio e os nenos e nenas podían despois levar para a casa as distintas pezas que confeccionaron. Houbo tamén música ao vivo pola mañá e pola tarde a cargo cun cuarteto tradicional galego para animar o espazo de traballo.

Dende confección de xoguetes a canteiros pasando por artesáns do coiro

En total, sesenta artesáns procedentes de toda Galiza pasarán por Lugo daquí ao mes de setembro para facer demostracións ao vivo dos seus oficios. Trátase dunha iniciativa que pon en marcha a área de Cultura e Turismo, que dirixe o tenente alcalde, o nacionalista Antón Bao, co obxectivo de encher de actividade as rúas da cidade de Lugo durante os meses do verán.

Na inauguración desta iniciativa celebrada esta mañá a concelleira Paz Abraira destacou que se trata en todos os casos de “artesáns que manteñen viva a tradición galega e que traballan distintos materiais, como o coiro, o ferro, a madeira ou o barro, empregando as mesmas técnicas que se usaron tradicionalmente no noso país”.

Os distintos oficios pasarán por Lugo dende hoxe ata o 11 de setembro. As demostracións terán lugar as fins de semana e nelas participarán torneiros de Ortigueira ou Grandas; ferreiros da Fonsagrada, Riotorto e Os Oscos; zoqueiros da Mariña, Vilalba, As Nogais e Vila de Cruces; cesteiros e palilleiras de distintos puntos da xeografía galega; canteiros de Guitiriz e Antas de Ulla; oleiros de Bonxe, Buño, Guindivós; fiadoras, redeiras, selleiros, artesáns do coiro, costureiras, bordadoras e expertos en alto lizo e mesmo fabricantes de instrumentos musicais e de xoguetes tradicionais.

Fomentar o emprego no sector

Paz Abraira incidiu en que esta iniciativa que se pon en marcha persegue varios obxectivos: “por un lado, dende o punto de vista cultural, serve para recuperar tradicións ancestrais do noso país e oficios que corren o risco de desaparecer e ademais serve para apoiar a labor dos artesáns e fomentar o emprego neste sector”, subliñou a concelleira nacionalista, que destacou que “grazas a esta labor de recuperación dos vellos oficios mozos de lugares con tradición artesá como a olería en Sober ou os ferreiros en Riotorto están atopando unha saída laboral”.

Abraira explicou que este programa de demostracións ao vivo substituirá ás visitas teatralizadas que se viñan realizando en veráns pasados para ensinar aos turistas a historia e as tradicións da cidade. “Pensamos que as demostracións ao vivo de vellos oficios cumpren mellor esta función porque son historia viva do noso pobo”, afirmou.

Indicou tamén que as Visitas Teatralizadas estaban pensadas só para os turistas e tiñan unha acollida moi limitada. Neste sentido deu o dato de que o ano pasado houbo días nos que se suspendeu a función por falta de público. En total, nos tres meses que estiveron funcionando as Visitas Teatralizadas o verán pasado vendéronse 547 entradas, o que dá unha media de 7 ao día. “Se temos en conta que nese mesmo período houbo 14.759 turistas na nosa cidade a media é realmente baixa”, opinou.

Ademais, as funcións das Visitas Teatralizadas eran de pago, cun custo de 5 euros por persoa. Pola contra, dixo Paz Abraira, estas demostracións de vellos oficios serán “totalmente de balde” e “están pensadas tanto para os turistas que nos visitan como para os moitos lugueses e luguesas que se quedan na cidade durante o verán”.

Encher de actividade as rúas de Lugo durante todo o verán

O obxectivo que se manexa dende a área de Cultura e Turismo para este verán é “encher de actividade as rúas de Lugo os meses de xullo e agosto para que non se produza un baleiro cultural na cidade”. Con esta intención, poranse en marcha distintas actividades durante os vindeiros meses, como as demostracións de oficios tradicionais na Praza Maior que comezan mañá e terán lugar cada fin de semana ata o 11 de setembro. Neste momento e ata o día 20 deste mes de xullo tamén está instalada no fondo da Praza Maior a Feira do Libro Vello. “Con esta programación trátase de ofrecer distintas propostas tanto aos lugueses e luguesas como aos turistas que nos visitan nos meses de xullo e agosto”, explicou Paz Abraira.





Compartir: