Tamén se aprobaron modificacións na ordenanza de espazos públicos adicados á venda ambulante para impedir a venda de vehículos na vía pública por empresas

O Concello de Lugo mantén o seu compromiso de apoio ó ensino público e a súa aposta pola educación e o benestar social nos investimentos municipais e vai adicar 222.976 euros á organización de actividades extraescolares e complementarias nos colexios públicos do noso municipio, financiadas pola institución local a través da Concellería de Educación. A Xunta de Goberno local acordou hoxe a actualización do prezo do contrato para a prestación deste servizo coa aplicación dun 3,23% de acordo co IPC, segundo explicaron os Concelleiros de Urbanismo, Luis Álvarez, e de Infraestruturas, Paz Abraira, na rolda de prensa posterior a reunión que celebrou o Goberno local.

Álvarez lembrou que o Concello de Lugo “foi pioneiro” na implantación deste tipo de servizos que inclúen tanto a organización de actividades extraescolares como os comedores escolares nos colexios públicos que contribúen a facilitar a conciliación familiar e laboral.

Ademais, a Concelleira de Infraestruturas anunciou a posta en marcha do procedemento para a contratación das obras de mellora do alumeado público en catro rúas do Casco histórico da cidade. Este proxecto de mellora do alumeado público acometerase nas rúas Teatro, Ánxel Fole, Progreso e parte da rúa Nóreas e sairá a licitación cun orzamento máximo de licitación de 121.531 euros e cun prazo de execución de tres meses.

Paz Abraira explicou que o proxecto levarase a cabo con financiamento do Concello que aportará 47.229 euros, do Ministerio, que achegará 46.811 euros, e da Xunta, cunha achega de 27. 490 euros.

A Concelleira de Infraestrutura salientou “con estes fondos vaise acometer esta obra e vaise seguir avanzando na mellora da iluminación pública no Casco histórico de Lugo e vanse empregar materiais acordes co entorno, xa que estamos falando da zona monumental da cidade”. Abraira tamén sinalou que “o prazo de execución é de tres meses, de xeito que a finais deste ano, unha vez realizado o proceso de contratación, acometerase a realización da obra e a substitución das luminarias existentes por outras máis eficientes”.

A Xunta de Goberno Local tamén aprobou na súa reunión de hoxe a modificación da Ordenanza de espazos públicos adicados á venda ambulante para prohibir a venda de vehículos na vía pública por parte de empresas dando a debida cobertura a venda de vehículos particulares efectuada polos seus titulares de xeito illado e puntual.

O Concello tamén lle deu o visto e prace a unha licenza solicitada pola empresa Decathlon para facer movementos de terras na parcela R, na esquina das rúas A e D do Parque Empresarial das Gándaras.