Imprimir

O CONCELLO VAI INSTALAR UN NOVO CIRCUÍTO BIOSAUDABLE NO PARQUE ROSALÍA DE CASTRO


28/9/2011 Será a sexta instalación de equipos de ximnasia ó aire libre que haberá en Lugo

O Concello instalará no parque Rosalía de Castro un novo circuíto biosaudable, o sexto da cidade, segundo anunciou o Concelleiro de Urbanismo, Luis Álvarez, na rolda de prensa posterior a reunión que celebrou hoxe a Xunta de Goberno Local.

O Goberno local aprobou esta mañá abrir o procedemento de contratación para a subministración e instalación de conxuntos ximnásticos nun espazo do parque de Rosalía de Castro, financiado polo Fondo Estatal para o Emprego e a Sostibilidade Local. A contía máxima do proxecto é de 55.155 euros e o prazo de entrega será como máximo de mes e medio.

Luis Álvarez explicou que o novo circuíto biosaudable atende unha demanda cidadá e forma parte da aposta que fai o goberno local para facilitar ós veciños, sobre todo ás persoas maiores, a posibilidade de facer exercicio ó aire libre nas zonas verdes da cidade.

O Concello leva investidos preto de 220.000 euros nos diferentes parques biosaudables instalados en diferentes puntos da cidade: en Albeiros, no Parque da Milagrosa, na Fonte dos Ranchos e na Carballeira de Fingoi. Proximamente poderase dispoñer do que se está construíndo no paseo interior da Muralla, con acceso dende a praza do Cantiño que está financiado con fondos do Plan Urban, e o do Parque Rosalía de Castro.