Arrinca un novo ciclo do programa de Animación á Lectura e Contacontos na Biblioteca Municipal

# Mércores, 02/11/2011

Dado que o aforo é limitado para asistir hai que retirar as invitacións na propia Biblioteca

Mañá comeza na Biblioteca Municipal un novo ciclo do programa de actividades de Animación á Lectura e Contacontos deseñado especialmente para os máis pequenos. Esta iniciativa, organizada pola Concellería de Cultura, Turismo e Promoción da Lingua, que dirixe o tenente alcalde nacionalista Antón Bao, busca fomentar o hábito da lectura a través de espectáculos de contacontos e obradoiros de monicreques ou de creación literaria cos que se fomenta o gusto polos libros e se estimula a imaxinación dos máis cativos. Para este trimestre están programadas catro sesións de contacontos dirixidas a nenos de 3 a 12 anos e que teñen unha duración prevista de 45 minutos. Estas actividades son gratuítas e celébranse cada quince días os xoves ás 19:00 horas na Biblioteca Municipal. Debido á limitación do aforo (máximo 30 participantes) hai que retirar as invitacións na mesma biblioteca.

O primeiro dos catro experimentados narradores que sorprenderán ao público infantil coas súas imaxinativas historias é Ramiro Neira, que presenta o seu espectáculo de “Contos ao ar” este xoves, 3 de novembro, as 19:00 horas. Ramiro Neira cre que o contacontos debe ser unha sorte de tolo aventureiro, que non tema ás alturas se hai que saír a voar, un pouco mago, pero que non desapareza no mellor do conto e outro pouco paiaso, que con todo sexa un eterno namorado da risa; tamén debe ser un pouco poeta, que xogue cas palabras, que invente xogos, que saiba contar o conto, e que non teña medo de comunicar emocións. Porque a fin de contas, diso están feitos os contos. As entradas para esta sesión pódense retirar na Biblioteca Municipal.

A segunda cita, que terá lugar o 17 de novembro, estará protagonizada pola actriz e dramaturga Soledad Felloza. “O Libredón, un bosque máxico” é o novo espectáculo desta contacontos, que leva máis de 23 anos sorprendendo cos seus relatos orais tanto a nenos como a adultos. Nesta ocasión presentará o misterio do Libredón, o bosque máxico no que se custodia o arca de Santiago.

Continúa o ciclo coa sesión de Iago López o 1 de decembro, que vai contar a historia de “Marcial, cempés”, o cal quere ser bailarín pero o feito de que ten cen pés non lle axuda nada na súa carreira no ballet.

A responsable de pechar o programa será Fátima Fernández, co seu espectáculo “Unha granxa diferente” onde os animais que a habitan non son o que aparentan, queren ser o que non son e queren vivir como os outros… Un grupo de animais que vai sorprender moito.

Coñeza a Biblioteca Municipal

Compartir: