Cargando....
Concello de Lugo
28/03/24
NOVAS
Escoita esta páxina

Os comercios de Lugo repartirán pegatinas en galego nos agasallos de Nadal


# Xoves, 22/12/2011
Os adhesivos inclúen o texto ‘Contén moito agarimo. Dillo en galego’ e forman parte dunha campaña de Promoción da Lingua deseñada polo Concello de Lugo

Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
Na iniciativa participan as principais tendas da cidade. Repartirán en total 100.000 pegatinas, tantas como habitantes ten Lugo
 

Un dos retos máis difíciles aos que se enfronta a lingua galega é a superación das limitacións dos campos de uso, restrinxidos ás veces ao doméstico, ao escolar ou ao administrativo. Por este motivo, a área de Promoción da Lingua do Concello de Lugo quere difundir o emprego do galego en todos os ámbitos da vida e, coincidindo con esta época do ano, deseñou unha campaña aproveitando os agasallos de Nadal que promociona o uso da lingua galega no sector do comercio.

Baixo o título Contén moito agarimo. Dillo en galego, a Concellería de Cultura, Turismo e Promoción da Lingua, que dirixe o tenente alcalde nacionalista, Antón Bao, as principais tendas de xoguetes e agasallos da cidade repartirán nos paquetes que elaboren estes días para os seus clientes e clientas pegatinas en galego. En total, repartiranse 100.000 adhesivos, tantos como habitantes ten Lugo.

O tenente alcalde e responsable da Concellería de Cultura, Turismo e Promoción da Lingua, Antón Bao, destacou esta mañá durante a rolda de prensa de presentación desta iniciativa o peso que o sector do comercio ten na cidade de Lugo. “É un sector moi importante en Lugo e que nesta época ten moito contacto cos cidadáns, por iso quixemos aproveitar esa plataforma para chegar aos lugueses e luguesas e felicitarlles o Nadal en galego”, explicou.

Sumáronse a esta iniciativa máis de 100 tendas e establecementos comerciais da cidade, entre elas o Centro Comercial As Termas, Arenal Perfumerías e numerosos comercios tanto do centro como do resto da cidade a título individual.


Partida específica de Promoción da Lingua nos Orzamentos do vindeiro ano
O tenente alcalde anunciou tamén que nos Orzamentos Municipais de 2012 figurará unha partida específica de 20.000 euros para Promoción da Lingua. Antón Bao indicou que a promoción do idioma galego é unha “obriga legal” das Administracións públicas fixada no Estatuto de Autonomía e na Lei de Normalización Lingüística.

Antón Bao indicou que o obxectivo é “incrementar o uso e o prestixio da nosa lingua en todos os sectores da sociedade”, para o que se porán en marcha distintas iniciativas de difusión do galego en todos os ámbitos da vida. O tenente alcalde rexeitou o termo “imposición” usado por sectores reaccionarios contra o galego e dixo que a Concellería de Cultura, Turismo e Promoción da Lingua porá en marcha distintas iniciativas “en positivo” que buscan achegar á sociedade ao galego.

Un desexo para 2012: “emprego para a xente”
O tenente alcalde, Antón Bao, aproveitou a rolda de prensa desta mañá para felicitar o Nadal aos lugueses e luguesas e para expresar os seus desexos para o 2012. “Eu pediríalle ao Apalpador, que é o personaxe galego desta época por excelencia, que traia emprego para a xente, que é o que fai falla o ano que ven”, desexou Bao.


Escoitar audio:
Escoitar audio:


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova