Imprimir

39 ARTISTAS PLÁSTICOS COLABORAN NUNHA EXPOSICIÓN COLECTIVA EN FAVOR DA SOCIEDADE PROTECTORA DE ANIMAIS DE LUGO


17/4/2012 Cederon as súas obras para recadar fondos para a Protectora lucense, que atende nestes momentos a máis de 400 animais

A exposición, inaugurada hoxe, poderá verse ata o 2 de maio na Sala de Exposicións do Centro Social Uxío Novoneyra

O tenente alcalde, o nacionalista Antón Bao, destaca o “grande nivel artístico” da exposición e a súa “vertente solidaria”


Unha exposición colectiva de artistas plásticos da talla de Bordel, Caxigueiro, Macía, Isabel Somoza, Eduardo Zurita, Xermán Refojo ou Santiago Catalán recadará fondos para a Sociedade Protectora de Animais e Plantas de Lugo. A mostra, que foi inaugurada hoxe, poderá verse ata o 2 de maio na Sala de Exposicións do Centro Social Uxío Novoneyra.

Un total de 39 artistas cederon as súas obras para esta mostra, na que colabora a área de Cultura do Concello de Lugo. Na inauguración desta iniciativa, o tenente alcalde, o nacionalista Antón Bao, destacou “o grande nivel artístico da mostra” e a súa “vertente solidaria”. Os artistas que participan na exposición doaron as súas obras para que os beneficios obtidos pola súa venda vaian a parar á Protectora de Lugo.

Segundo explicou o seu presidente, Javier García Calleja, a Protectora lucense atente nestes momentos a máis de 400 animais. O número de animais atendidos duplicouse nos últimos dous anos, polo que a Sociedade carece dos fondos necesarios para chegar a fin de ano, segundo expuxo o seu presidente. Con esta iniciativa preténdese tamén “chamar a atención da sociedade sobre o abandono dos animais”.

Obras para todos os petos

O coordinador da exposición, Antonio Prado, explicou que esta mostra chega xa á súa sexta edición pero que levaba 6 anos sen facerse. Entre as obras, todas elas de grande calidade artística, hai pintura, gravado ou fotografía de estilos moi variados, dende estilos máis clásicos a estilos vangardistas. Os seus prezos oscilan entre os 50 e os 300 euros.