Cargando....
Concello de Lugo
18/11/19
NOVAS
Escoita esta páxina

Os lucenses elixirán o cartel das festas do San Froilán


# Xoves, 31/05/2012
O Tenente de Alcalde, Antón Bao,e o xurado celebran o récord de participación no Premio de Deseño Gráfico “San Froilán 2012”

Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
O gañador, que se coñecerá o 20 de xuño, será elixido entre o 4 e o 18 de xuño a través dun sistema de votación popular online na web www.sanfroilan.info

“Dominó” de Violeta Vázquez Lence será o cartel anunciador do
San Froilán Miúdo 2012

As engrenaxes para a organización das festas de San Froilán 2012 continúan a funcionar e, na tarde deste mércores 31 de maio, reuniuse o xurado de expertos para seleccionar aos catro semifinalistas do Premio de Deseño Gráfico “San Froilán 2012” e escoller o cartaz gañador do certame de “San Froilán Miúdo 2012”. Esther Muñoz, representando a Escola de Arte e Superior de Deseño Ramón Falcón, Cheché Real, como presidente da Asociación Provincial de Hostalería, e o pintor e artista lucense Miguel Anxo Martínez “Macía”, constituíron este xurado de expertos que ás 18:00 horas reuniuse na Casa Consistorial para analizar os traballos presentados.

E traballo non lles faltou, pois como indicou o Tenente de Alcalde e Responsable da Área de Cultura, Turismo e Promoción da Lingua, Antón Bao, “bateuse un récord de participación no certame do San Froilán”. En total, foron 130 carteis os que concorreron e, en valoracións do edil nacionalista, esta alta participación pode deberse ao emprego das novas tecnoloxías como medio para concursar, pois case todos os participantes enviaron o seu traballo por correo electrónico. Chegaron cartaces de distintas zonas do Estado e máis de un enviou varios traballos.

Entre os 130 carteis, o xurado de expertos escolleu os catro semifinalistas “Tatoo”, “Traxes galegos”, “A ledicia do outono galego” e “A todo polbo lle chega o San Froilán”, tres dos cales están asinados por autores de Lugo e o restante ven de Pontevedra. Os membros do xurado coincidiron en salientar o altísimo nivel dos traballos presentados e valoraron moi positivamente o talento dos concursantes. Destaca a variedade de estilos e a creatividade dos catro semifinalistas o que permitirá que o público escolla entre traballos de dispares estilos, pero todos representativos do San Froilán, e abarcar todos os gustos.

Na seguinte fase, que arrinca o 4 de xuño coa activación na web www.sanfroilan.info do sistema de votación on-line, o público será o que escolla o cartaz anunciador do San Froilán 2012. Con esta medida, os lucenses e todos aqueles que aprecian o San Froilán poderán participar na elección do cartaz que promocionará as nosas festas. Deste xeito, cúmprese un dos obxectivos da concellería que dirixe Antón Bao e que é o de fomentar aínda máis a implicación dos lucenses na organización das súas festas patronais.

A resolución deste certame farase pública o 20 de xuño de 2012 e o sistema de votación on-line estará aberto ata o 18 de xuño. Ademais de votar polo seu cartaz favorito, os participantes na votación entrarán nun sorteo de distintos premios que se celebrará o xoves 21 de xuño.

Respecto ao Premio de Deseño Gráfico “San Froilán Miúdo 2012”, a participación ascendeu a 53 cartaces e a gañadora foi Violeta Vázquez Lence que presentou un vistoso debuxo titulado “Dominó”.
BASES DO PREMIO DE DESEÑO GRÁFICO “SAN FROILÁN 2012”

1ª.- Poderán concorrer cantas persoas o desexen, con traballos de técnica libre, presentando cada un cantas obras considere oportunas, sendo condición indispensable que as obras sexan orixinais.

2ª.- Os deseños contribuirán a enxalzar a cidade de Lugo e as súas festas patronais de San Froilán. Deberán incluír o texto: LUGO, SAN FROILÁN 2012, 4-12 DE OUTUBRO, Festa de Interese Turístico Galego. Fiesta de Interés Turístico Estatal, así como a imaxe corporativa do Concello, distribuído da maneira que elixa cada autor. Esta última poderá ser descargada dentro do site especial dedicado ao concurso en www.sanfroilan.info/concursocarteis

3ª.- O autor do deseño que resulte gañador recibirá un premio dotado con 2.000,00 €. Este premio estará suxeito a unha retención do 19 % de acordo coa Lei 26/2009, do 23 de decembro, do imposto sobre a renda das persoas físicas.

4ª.- O cartel seleccionado quedará en poder do Concello de Lugo, que poderá reproducilo no tempo e maneira que estime oportunos.
O cartel gañador será propiedade do Concello, que poderá cedelo a terceiros. Os autores renuncian a todos os dereitos de explotación, só conservarán os dereitos de autor para incluílo no seu curriculum.

5ª.- Resumo cronolóxico - fases
- Inscrición e presentación de propostas: do mércores 9 ao mércores 30 de maio.
- Deliberación do xurado e elección dos catro finalistas: xoves 31 de maio
- Votación do público: do luns 4 ao luns 18 de xuño.
- Anuncio e comunicación ao gañador ou gañadora: mércores 20 de xuño.
- Sorteo de premios entre os votantes da opción gañadora: xoves 21 de xuño.


6ª.- Entrega de traballos: Presentaranse na Concellería de Cultura, Turismo e Promoción da Lingua, na praza Maior, 1, 27001, Lugo entre o mércores 9 e o mércores 30 de maio, en formato dixital (en soporte cd ou lapis de memoria), persoalmente ou por correo postal.
Poderase enviar tamén por correo electrónico ao enderezo culturaarrobaconcellodelugo.org, indicando CARTEL SAN FROILÁN 2012.
Non obstante, se algún participante o desexa e para unha mellor valoración da súa proposta, tamén pode entregar o cartel montado a sangue sobre cartón pluma de 5 ou 10 mm e a un tamaño de 50x70 cm.
O cartel debe ter un lema ou título, que tamén se incluirá no exterior dun sobre pequeno, dentro do cal se incluirá un formulario con nome, apelidos, enderezo, correo electrónico e teléfono ao presentar as súas propostas.

7ª.- Os carteis deben presentarse en formato JPG, cunhas dimensións de 50x70 cm e con 72 ppp de resolución (1417x1984 píxeles), e o gañador ou gañadora deberalle facilitar ao Concello, nos prazos que este indique, diferentes adaptacións e aplicacións para a promoción, comunicación e sinalización do evento.

8ª.- Os carteis deberán evitar calquera tipo de propaganda subliminar que poida inducir ao consumo de alcohol ou calquera outro tipo de drogas, segundo a lexislación vixente. Todas as propostas presentadas quedarán pendentes de aprobación por parte do Concello de Lugo, que se reserva o dereito de rexeitar as propostas que considere ofensivas ou inadecuadas. No caso de que isto ocorrera, o Concello decidirá se lle comunica ao autor ou autora cales son os motivos polos que se rexeitan as propostas. Unha vez superada esta fase, procederase á inmediata publicación dos carteis presentados.

9ª.- Sistema de votación popular online. Para a elección dos carteis gañadores, o xurado preseleccionará catro propostas que poderán ser votadas polo público en www.sanfroilan.info/concursocarteis.
Todas as votacións realizaranse online a través deste site. Cada usuario poderá emitir un único voto ao día.
Sortearanse premios entre os votantes do cartel que finalmente resulte gañador ou gañadora.

10ª.- O xurado estará formado por persoas cualificadas na materia. O ditame do xurado e do resultado da votación popular será inapelable.

11ª.- Os participantes someteranse á decisión do xurado e á votación popular, e o gañador do certame comprométese a recoller persoalmente o premio ou facerse representar debidamente no acto, para o cal será convocado oportunamente.

12ª.- Os participantes responsabilízanse totalmente de que non existen dereitos de terceiros nas obras presentadas, e renuncian a toda reclamación por dereitos de imaxe.

13ª.- O simple feito da presentación ao concurso supón a plena aceptación destas bases.


BASES DO PREMIO DE DESEÑO GRÁFICO "SAN FROILÁN MIÚDO 2012"

1ª.- Poderán concorrer cantos rapaces e rapazas o desexen, menores de 15 anos, con traballos de técnica libre, presentando cada un cantas obras considere oportunas, sendo condición indispensable que as obras sexan orixinais.

2ª.- Os deseños contribuirán a enxalzar a cidade de Lugo e súas festas patronais de San Froilán. Deberán incluír o texto: LUGO, SAN FROILÁN MIÚDO 2012

3ª.- O autor ou autora do deseño que resulte gañador recibirá un premio consistente nun agasallo adecuado á súa idade.

4ª.- O cartel seleccionado quedará en poder do Concello de Lugo, que poderá reproducilo no tempo e maneira que estime oportunos. Os carteis presentados poderán ser expostos ao público.
O cartel gañador será propiedade do Concello, que poderá cedelo a terceiros. Os autores renuncian a todos os dereitos de explotación, só conservarán os dereitos de autor para incluílo no seu curriculum.

5ª.- A entrega de orixinais, por correo ou persoalmente na Concellería de Cultura, Turismo e Promoción da Lingua do Concello de Lugo, poderase efectuar entre o mércores 9 ao mércores 30 de maio, ata as 14.30 horas.

6ª.- Os traballos deberán ser presentados de maneira anónima, con lema, acompañando un sobre co mesmo lema no exterior, e dentro os datos do participante, tales como nome, apelidos, enderezo, correo electrónico dos pais e teléfono.

7ª.- Os carteis terán as dimensións dun DIN A-4 ( 21 x 29,7 cm) como mínimo, e deberán entregarse montados sobre cartón pluma ou soporte ríxido. Non se admitirán os presentados con cristal.

8ª.- O xurado estará formado por persoas cualificadas na materia.

9ª.- As obras non premiadas devolveranse ós autores que o soliciten nun prazo dun mes a partir do coñecemento do ditame do xurado. Os orixinais que non fosen reclamados serán destruídos sen que sexa admisible recurso ningún sobre esta resolución.

10ª.- Os participantes someteranse á decisión do xurado, que resolverá sobre calquera dúbida non prevista nas presentes bases, e o gañador do certame comprométese a recoller persoalmente o premio ou facerse representar debidamente no acto, para o cal será convocado oportunamente.

11ª.- Os participantes responsabilízanse totalmente de que non existen dereitos de terceiros nas obras presentadas, e renuncian a toda reclamación por dereitos de imaxe.

12ª.- O simple feito da presentación ao concurso supón a plena aceptación destas bases.

www.sanfroilan.info


Escoitar audio:


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova