A Concellería de Protección Cidadá vén de adquirir 45 modernos cascos para mellorar o equipamento do que dispón o Corpo de Bombeiros de Lugo.
Hoxe comezou a subministración dos novos cascos que, entre outras características técnicas, dispoñen dunha pantalla de protección facial que é resistente ós produtos químicos.
Tamén están dotados cun visor ocular que asegura a protección dos ollos fronte a impactos e proxeccións.
Os novos cascos están deseñados para traballar con obxectos cortantes, produtos sólidos ou líquidos corrosivos e con produtos químicos. Tamén serven para traballar con metais fundidos, calor radiante, chamas e corrente eléctrica.
Contan, ademais con un acondicionamento que permite a instalación tanto de sistemas de comunicación como de iluminación.
O investimento que fixo o Concello para a compra deste material foi de 15.292 euros.