Cargando....
Concello de Lugo
12/07/20
NOVAS
Escoita esta páxina

Aumenta o número de turistas que visitan Lugo pero reducen a súa estancia e o gasto na cidade por mor da crise económica


# Venres, 03/08/2012
Parellas sen fillos procedentes doutros lugares do Estado español conforman o prototipo de turista que visita a cidade aínda que aumenta cada ano o número de turistas procedentes doutros países da UE

Imaxe Asociada
  • Imaxe Asociada
  • Imaxe Asociada
  • Imaxe Asociada

Antón Bao anuncia unha campaña de promoción do San Froilán nas etapas da Vuelta Ciclista a España

A segunda quincena de xullo foi a época, no que vai de ano, na que a cidade de Lugo recibiu máis turistas cunha media de 239 visitas diarias. Un total de 4.742 persoas dirixíronse á Oficina Municipal de Turismo, situada na Praza do Campo, para demandar información sobre a cidade, segundo os datos facilitados hoxe polo responsable de Turismo, e alcalde en funcións, Antón Bao.

Os datos revelan, segundo Antón Bao, “un lixeiro incremento no número de visitantes no que vai de ano (1,6%) respecto ás mesmas datas do pasado ano”. De xaneiro a xullo visitaron a oficina de turismo da cidade 18.798 persoas, 303 máis que no primeiro semestre de 2011. A pesar de que non se reduciu o número de visitantes si que se reduciron as estadías e o gasto dos turistas durante as súa estancia na cidade. Esta redución está motivada pola crise económica, que reduce o poder adquisitivo das familias e frea os desprazamentos vacacionais.

Por meses, xullo foi ata o de agora o mes con máis turistas (4.742), seguido de abril (3.425), por coincidir neste mes este ano a Semana Santa, na que visitaron a cidade de Lugo 1.677 turistas que pasaron pola Oficina Municipal de Turismo a solicitar algún tipo de información. O ano 2011 pechouse cun total de 36.379 visitantes, unha cifra á que a área de Turismo, que dirixe o nacionalista Antón Bao, espera achegarse este ano.

Antón Bao salientou sen embargo, en consonancia co que veñen detectando os hostaleiros e as axencias de viaxes, que a crise económica está reducindo as estancias e o gasto medio dos turistas. Como exemplo puxo un dato: no que vai de ano nos museos que dependen do Concello vendéronse 1.200 entradas menos que no mesmo período do pasado ano (11.812 de xaneiro a xullo de 2011 e 10.615 de xaneiro a xullo de 2012). O Museo que segue tendo máis visitas segue a ser a Casa dos Mosaicos, por diante do Centro de Interpretación da Muralla e do Museo de Porta Miñá.

O prototipo de turista que visita Lugo é o de unha parella de mediana idade procedente doutra comunidade do Estado español que ven a Lugo sen os fillos. Segundo explicou Antón Bao, 8 de cada 10 turistas que veñen á nosa cidade fano por libre, é dicir, pola súa conta e sen viaxe organizada, mentres que 2 de cada 10 fano dentro dunha excursión en grupo. 

Procedencia: aumento no número de turistas europeos

Un feito salientable dos datos de turistas deste primeiro semestre do ano é o aumento de visitantes procedentes doutros países da Unión Europea. O 12% dos turistas que viñeron a Lugo entre xaneiro e xullo procedían dalgún país da UE. Francia, Alemania e Reino Unido son os países dos que proceden a maioría dos turistas europeos que visitan a cidade de Lugo. Antón Bao destacou que este é un turismo en ascenso en Lugo e que as cifras de turistas estranxeiros procedentes da UE logradas este ano duplican as de hai dous anos.

Con todo, e pese ao aumento de turistas estranxeiros, o número de turistas que proceden doutros lugares do Estado español segue a ser maioritario. Concretamente, o 71% dos visitantes contabilizados na Oficina Municipal de Turismo proceden dalgún lugar do Estado español. Madrid, Castela-León, Asturias, Comunidade Valenciana, Cataluña, Andalucía, País Vasco e Cantabria son, por este orde, as comunidades que máis turistas envían a Lugo.

Finalmente, o 6% dos turistas que veñen a Lugo proceden dalgunha das 4 provincias galegas, o 5% proceden do continente americano e o 1% restante doutros países, fundamentalmente china e Xapón.

Campañas de promoción turística

Antón Bao anunciou unha serie de campañas de promoción turística de Lugo co obxectivo de atraer visitantes cara a nosa cidade. Entre as novidades está unha campaña de promoción do San Froilán que se levará a cabo nas etapas da Vuelta Ciclista a España en colaboración coas Denominacións de Orixe Galegas e a Asociación Provincial de Empresarios de Hostalaría.

Neste momento está tamén en marcha unha campaña de promoción da cidade no resto de vilas e cidades galegas que se está a levar a cabo durante os meses de verán. A través de paneis informativos de 10 metros de longo infórmase dos distintos atractivos de Lugo e das distinta oferta de actividades que hai en marcha. Esta campaña itinerante está estes días na cidade de Ferrol, coincidindo coas súas festas. 

O responsable de Turismo tamén indicou que as visitas turísticas postas en marcha na cidade, que se manterán ata o 13 de outubro, están a ser un éxito. Cada día unha media de entre 10 e 15 persoas apúntase a estes itinerarios guiados que saen ás 12:30 horas de diante da Oficina de Turismo.

Os datos de turismo en Lugo

  ANO 2012 ANO 2011 ANO 2010
Xaneiro 692 630 894
Febreiro 1.426 1.150 1.052
Marzo 2.213 2.118 2.444
Abril 3.425 3.299 3.079
Maio 3.058 2.939 2.695
Xuño 3.242 3.621 3.752
Xullo  4.742 4.738 4.526
TOTAL (1 xaneiro ao 31 xullo) 18.798 18.495 18.442


www.lugoturismo.com

 


Escoitar audio:


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova