Imprimir

A XI EDICIÓN DO TORNEO INTERNACIONAL DE FÚTBOL SALA DE BASE "CIDADE DE LUGO" REUNIRÁ A MÁIS DE 100 CLUBS DE TODA ESPAÑA


20/12/2012 A primeira fase disputarase os días 27, 28 e 29 de decembro. A fase final será os días 2, 3 e 4 de xaneiro

Os partidos xogaranse no Centro Deportivo Terra, na Casa do Deporte, no Polideportivo O Palomar e no da Piringalla e no Palacio Municipal dos Deportes de Lugo

O Concelleiro de Deportes, José Manuel Díaz Grandío, o Xefe de Servizo Provincial da Xunta de Galicia, Manuel Otero, e o Xerente da Fundación Azkar, Iván Pico, presentaron esta mañá a XI edición do Torneo Internacional de Fútbol Sala de Base Cidade de Lugo.

Segundo destacou o Concelleiro de Deportes, “este torneo ademais da importancia que ten dentro do mundo do deporte, tamén supón unha fonte de ingresos para os comercios lucenses xa que se reunirán moitas persoas de fora de Lugo”. Este ano,o torneo contará con 114 equipos participantes de Galicia, Castela a Macha, Cataluña, Comunidade de Madrid, ou a Rexión de Murcia, entre outros.

A primeira fase do torneo disputarase os días 26, 27 e 28 de decembro e terá 64 equipos participantes. A fase final será disputada por 52 equipos e terá lugar os días 2, 3 e 4 de xaneiro. Entre as dúas fases haberá 1.400 xogadores e xogadoras que participan nas distintas categorías de benxamín, alevín, infantil e cadete (masculino e feminino).

Os partidos xogaranse en distintas instalacións deportivas da cidade, como o Centro Deportivo Terra, a Casa do Deporte, o Polideportivo O Palomar, o Polideportivo da Piringalla e o Palacio Municipal dos Deportes de Lugo.