Cargando....
Concello de Lugo
23/11/19
NOVAS
Escoita esta páxina

O Alcalde destaca a importancia da formación dos xóvenes na clausura dos obradoiros organizados dentro do programa europeo Muralla Dixital


# Mércores, 27/03/2013


Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
  • Imaxe Asociada
Hoxe recibiron os diplomas os 32 participantes nos catro obradoiros organizados polo Concello para dixitalizar o patrimonio cultural lucense e ampliar a formación de mozos desempregados

Os alumnos aprenderon o uso de novas tecnoloxías e a súa aplicación ó patrimonio documental e arqueolóxico de Lugo


O Alcalde, José López Orozco, presidiu hoxe a entrega de diplomas ós mozos que participaron nos obradoiros organizados polo Concello de Lugo dentro do programa europeo Muralla Dixital. O acto, co que remataron os catro obradoiros do programa de formación desenvolvido ó abeiro deste proxecto europeo, celebrouse esta mañá na Casa do Concello e contou coa asistencia, tamén, da Concelleira de Educación, Formación e Orientación Laboral, Esther Muñoz, e doutros membros da Corporación municipal.

Na súa intervención, o Alcalde salientou a “necesidade de mellorar a formación dos mozos para facerlle fronte a estes tempos tan complicados que vivimos” e despediu ós participantes no programa desexándolles que a formación que recibiron durante estes cinco meses lles sexa de utilidade na súa vida profesional.

Este programa de formación, no que se empregaron as novas tecnoloxías da información e da comunicación, é unha das iniciativas que leva a cabo o Concello de Lugo para mellorar a formación dos mozos co obxectivo de favorecer a súa inserción laboral ó tempo que supón unha nova aposta pola difusión do patrimonio cultural lucense.

O programa consistiu na organización de catro obradoiros, nos que se empregaron as novas tecnoloxías da información e da comunicación, e que contaron coa participación de 32 persoas desempregadas, con idades comprendidas entre 18 e 35 anos, que están en posesión dunha licenciatura ou son técnicos superiores en formación profesional.

Os obradoiros, que remataron hoxe, comezaran o pasado 2 de novembro e durante este tempo os alumnos percibiron unha bolsa remunerada con 865 euros mensuais.

Durante este tempo, os alumnos formáronse no manexo de diferentes ferramentas tecnolóxicas de rexistro, documentación e difusión que van ser aplicadas no patrimonio cultural de Lugo, con especial incidencia sobre a Muralla e os restos arqueolóxicos do Lugo romano.

Os catro obradoiros

Un dos catro obradoiros adicouse á dixitalización do patrimonio documental lucense, e nel os alumnos aprenderon técnicas de reprografía dixital de documentos de gran valor histórico, como é o caso da documentación histórica e arqueolóxica depositada no Concello de Lugo relacionada principalmente coa súa evolución urbanística e coa muralla. Os participantes neste obradoiro aprenderon, por exemplo, o manexo de escáneres de alta velocidade e mesas de reproducción con cámara dixital.

Un segundo obradoiro tratou sobre dixitalización 3D do patrimonio histórico-arqueolóxico lucense. Nel os alumnos aprenderon as distintas técnicas de rexistro espacial 3D a través da súa aplicación práctica sobre o patrimonio histórico-arqueolóxico da cidade, con especial incidencia na técnica da fotogrametría dixital aplicada á dixitalización 3D de pezas arqueolóxicas descubertas nas excavacións de Lugo.

Outro dos obradoiros foi sobre fotografía dixital panorámica 360º do patrimonio histórico-arqueolóxico lucense. Neste caso, os alumnos formáronse nas novas técnicas da fotografía dixital panorámica 360º e a súa aplicación práctica sobre os principais elementos do patrimonio histórico-arqueolóxico da cidade, con especial incidencia sobre a Muralla Romana, o que vai permitir a creación de visitas virtuais dos mesmos para contribuir á súa difusión.

O último dos obradoiros adicouse ó modelado e animación 3D do patrimonio histórico-arqueolóxico lucense. Os participántes nel formáronse nas técnicas de reconstrución virtual 3D a travñes da súa aplicación práctica sobre os principais elementos do patrimonio histórico-arqueolóxico da cidade, especialmente sobre os restos arqueolóxicos da época romana, o que vai permitir unha mellor comprensión dos mesmos.

Unha iniciativa cofinanciada pola Unión Europea

Esta acción formativa inscríbese no proxecto Muralla Dixital, que é un proxecto europeo cofinanciado nun 75% pola Unión Europea a través do Fondo Europeo de Desenvolvementeo Rexional (FEDER), no marco do Programa de Cooperación Transfronteiriza España-Portugal 2007-2013 (POCTEP) que ten como obxectivo principal a creación dunha rede de cidades amuralladas de Galicia e Norte de Portugal que aposten pola xestión conxunta para a valorización e difusión do seu patrimonio histórico-arqueolóxico a través das novas tecnoloxías da información e da comunicación.

O proxecto Muralla Dixital está liderado polo Concello de Lugo e conta coa participación como socios da Universidade de Santiago de Compostela, a través da Facultade de Humanidades do Campus de Lugo; Ineo (Asociación Multisectorial de Novas Tecnoloxías de Información e Comunicación), Centro de Computação Gráfica Azurém (Universidade do Minho) e os Cámaras portuguesas de Valença do Minho, Monçao e Melgãço. O orzamento global deste programa é de 1.883.800 euros.


(Máis información na web www.muralladigital.eu)


Compartir:
Facebook Del.icio.us My Yahoo Technorati Meneame Wikio
RSS                                      Plan Avanza,Abre fiestra nova Instituto de Crédito Oficial,Abre fiestra nova