Imprimir
O CONCELLO DE LUGO APOIA NAS SÚAS REIVINDICACIÓNS ÓS AFECTADOS POLAS PREFERENTES E PIDE QUE SE LLES DEVOLVA O DIÑEIRO
17/7/2013 O Alcalde e os Voceiros do PP e do BNG compareceron con representantes da Plataforma de afectados para manifestar o apoio da Corporación municipal, que tamén tomou un acordo plenario por unanimidade
O Concello de Lugo volveu expresar hoxe o seu apoio ós afectados polas preferentes na loita que manteñen para recuperar os seus aforros.
O Alcalde, José López Orozco, e os Voceiros do Grupo Popular, Jaime Castiñeira, e do BNG, Antón Bao, xunto cos representantes da Plataforma de afectados polas preferentes, Xavier Novo e Digna Lagarón, participaron nun acto no que se reclamou a devolución dos cartos a todos os aforradores que foron vítimas das preferentes.
O Alcalde destacou que o apoio desta Corporación ós afectados polas preferentes xa se manifestou nun acordo plenario aprobado por unanimidade e sinalou que o feito de que hoxe volvan estar dando ese apoio os tres grupos políticos representa o espíritu de colaboración para lograr o obxectivo de lograr a recuperación dos cartos.
No acto, celebrado esta mañá no Salón de Plenos da Casa do Concello, estiveron presentes numerosos membros da Plataforma de afectados polas preferentes que reivindican a devolución dos seus cartos.