O Concello promociona Lugo en Xantar, o 16º Salón Internacional de Turismo Gastronómico de Ourense

# Venres, 06/03/2015
O Alcalde de Lugo, José López Orozco, e a Concelleira de Cultura, Turismo, Xuventude e Promoción da Lingua, Carmen Basadre, participaron hoxe no Día de Lugo que se celebrou dentro do 16º Salón Internacional de Turismo Gastronómico Xantar, en Expourense.

O Alcalde, durante a súa intervención no acto institucional, aproveitou para destacar a importancia do turismo gastronómico e para promocionar Lugo e a Galicia interior.

Tamén manifestou López Orozco que “non se pode entender o desenvolvemento de Galicia sen contar coas provincias de Ourense e Lugo”, polo que reivindicou a conexión por autovía entre as dúas cidades, o que permitiría ós lucenses “achegarnos máis a Ourense e, tamén, situarnos moi cerca de Portugal”.

O Concello de Lugo participa no 16º Salón Internacional de Turismo Gastronómico, que se celebra en Expourense dende o día 4 ata o 8 de marzo, para promocionar tanto a gastronomía como a oferta turística da nosa cidade, dando a coñecer os atractivos culinarios, culturais e medioambientais que ofrece Lugo.

Nesta edición de Xantar participan máis de vinte restaurantes procedentes de toda Galicia, entre eles o Mesón de Alberto, de Castela e León e varias rexións turísticas de Portugal ademais de Costa Rica. Durante os catro días ofrécense ós visitantes menús elaborados con produtos autóctonos e de calidade, amparados en Denominacións de Orixe ou Indicación Xeográfica Protexida, e tamén se trata de darlles promoción ós produtos agrogandeiros e do mar.

O programa de actividades inclúe tanto conferencias de expertos como exhibicións de cociña en directo, ademais de catas comentadas e degustacións, cun total de máis de 100 actividades orientadas a profesionais e afeccionados co fin de poñer en valor os produtos saudables e de apostar pola profesionalización do sector.


Compartir: