| Presentación do Alcalde |

As estatísticas están a ofrecer cifras alarmantes sobre drogadicción, cifras que non poden deixarnos indiferentes. De sobra son coñecidas as repercusións perniciosas que ten o consumo de estupefacientes e, aínda así, o número de consumidores segue a crecer, e, o que é máis grave, cada vez son máis novos os que comezan a consumir.

A solución para evitar estas prácticas, ademais do control policial e xurídico, vén da man da prevención. A concienciación, con programas de ocio alternativo como Elixe a túa noite; as charlas, a orientación e a axuda son unha parte moi importante desta loita. O Concello de Lugo non quere deixar de aproveitar todas as canles posibles para achegarse á mocidade e concienciala das consecuencias deste consumo, moitas veces indiscriminado. Internet supón a canle de maior dimensión, pola súa aceptación e pola súa xeneralización entre o público con máis risco de caer na dependencia.

É un pracer para min darlle a benvida a esta web, realizada co esforzo do Servizo de Prevención de Drogodependencias do Concello de Lugo e co apoio incondicional deste equipo de goberno. O seu traballo redundará, estou convencido, nunha maior concienciación de todos aqueles que se poden sentir tentados por un mundo que, ata o de agora, non ofreceu ningunha vantaxe.