Máis de cen desempregados participaron nos sete cursos da primeira fase de Lugo Emprego Activo 2 organizados polo Concello con financiamento europeo
13/06/2013
O Alcalde e a Concelleira de Educación entregaron os diplomas ós participantes nos cursos nun acto que se celebrou no Espazo>Lab
O Alcalde, José López Orozco, e a Concelleira de Educación e Orientación Laboral, Esther Muñoz, entregaron os diplomas ós participantes nos cursos do programa de formación e inserción laboral “Lugo emprego activo 2”, que cofinancia o Fondo Social Europeo.
Nestes cursos, organizados polo Concello, participaron un total de 105 persoas desempregadas. O acto de entrega dos diplomas tivo lugar na Aula multiusos do Espazo>Lab, o centro municipal de formación e orientación laboral.
O Alcalde destacou a importancia da formación para afrontar o difícil reto da busca de traballo nun momento de tantas complicacións no mundo laboral e manifestou que, unha vez realizados os cursos, é o momento de loitar sen caer no desánimo para atopar un emprego.
López Orozco tamén lles ofreceu os servizos do Espazo>Lab para recibir asesoramento na busca de emprego, aínda que lembrou que o Concello non ten competencias nesta materia.
Na primeira fase deste programa puxéronse en marcha sete cursos sobre atención sociosanitaria a persoas dependentes en institucións, monitor/a de ludotecas, monitor/a de turismo activo, enquisador/a, técnico/a en transporte sanitario, instalación e mantemento de xardíns e zonas verdes e elaborador/a de produtos lácteos.
Cada un deles contou coa participación de 15 alumnos.
Os alumnos destes cursos completaron a súa formación coa participación en obradoiros de busca activa de emprego e autoemprego e, ademais, recibiron formación transversal de habilidades sociais, hábitos laborais, novas tecnoloxías da información, sensibilización no medio ambiente, loita contra a exclusión social e igualdade de oportunidades entre mulleres e homes.
Unha vez rematados os cursos, os técnicos do Espazo>lab comezan a realizarlles o seguimento para axudalos na busca activa para a súa inserción laboral.
Cooperación