Europa vaise poñendo á altura dos EE. UU. e Xapón en innovación, pero debe superar importantes diferenzas entre países, segundo un informe da UE.
Cada ano o "Marcador da Unión pola Innovación" mide os avances dos países da UE baseándose en 25 criterios que abranguen:
• as condicións previas para a innovación:
- financiamento
- educación
- publicacións científicas
• esforzo innovador que realizan as empresas:
- niveis de investimento
- solicitudes de patentes
• a medida en que a innovación beneficia á economía.
O informe deste ano mostra que Europa está a reducir distancias cos EUA e Xapón, e aínda vai por diante de Australia, Canadá e as principais economías emerxentes.
Non obstante, segue habendo importantes diferenzas de resultados entre os países da UE e disparidades rexionais dentro de cada país.
En conxunto, a mellora da innovación viuse impulsada por un aumento tanto das solicitudes de marcas de ámbito europeo ("marcas comunitarias"), coma de estudantes de doutorado procedentes de fóra da UE. Non obstante, a baixada do investimento de capital risco freou esta evolución positiva.
Diferenzas a escala europea
Dentro da UE, seguen manténdose á cabeza os países que invisten máis en investigación e innovación: Suecia, Dinamarca, Alemaña e Finlandia. Estes países obteñen bos resultados en todos os criterios. España sitúase no grupo dos "innovadores moderados", xa que os seus resultados están por debaixo da media da UE.
Portugal, Estonia e Letonia rexistran os maiores avances nos dous anos anteriores. Non obstante, este último país obtén -xunto con Bulgaria e Romanía- unha cualificación "moi inferior" á media da UE.
O informe pretende contribuír a que os países da UE detecten os seus puntos fortes e débiles, co fin de concentrarse nos aspectos que requiren maior esforzo.
Desequilibrios rexionais
Poucos países alcanzaron niveis de rendemento homoxéneos en todo o seu territorio. En realidade, as diferenzas entre rexións acrecentáronse nos últimos dous anos.
Non obstante, grazas aos Fondos Estruturais e de Investimento Europeos, as rexións contarán a partir de agora con máis de 100.000 millóns de euros para desenvolver a investigación e a innovación.
A innovación é o motor da economía
A innovación é esencial para lograr unha Europa máis competitiva e impulsar o crecemento económico.
Por iso, a UE desexa aumentar o investimento en innovación para situala no 3% do PIB en 2020.
Contribuirá a aumentar o peso da industria manufactureira no PIB ata o obxectivo do 20%.
Comunicado de prensa - Unha Europa máis innovadora con diferenzas rexionais aínda elevadas
Preguntas frecuentes - Resultados da innovación: comparación entre Estados membros da UE
Marcador da Unión pola Innovación
Marcador rexional da innovación
Traballar máis para impulsar a innovación