06/06/2014
Os eurodeputados dispóñense a entrar en funcións no novo Parlamento Europeo, e unha das primeiras cousas que farán é ver en que comisións parlamentarias estarán encadrados. Trátase dunha decisión crucial que determinará o terreo no que concentrarán o seu traballo. As comisións parlamentarias desempeñan un papel clave na actividade política: elaboran as posicións da Eurocámara en todo canto está incluído nas competencias desta.
Os eurodeputados dedican dúas semanas ao mes, de media, en reunións de comisións, nas que debaten informes lexislativos e non lexislativos, propoñen e votan emendas, e seguen as negociacións cos Gobernos nacionais. As comisións tamén organizan sesións con expertos, seguen o traballo das outras institucións e organismos da Unión Europea, e preparan informes de propia iniciativa que non teñen valor legal pero mostran a posición da Eurocámara sobre o asunto do que tratan.
Houbo 20 comisións permanentes na lexislatura parlamentaria que vai de 2009 a 2014. As súas competencias abrangueron dende o comercio internacional ata a protección dos consumidores, pasando pola igualdade de xénero. O Parlamento tamén pode crear comisións especiais como as tres que houbo durante a lexislatura que agora remata (unha sobre desafíos políticos, outra sobre a crise e a terceira sobre a delincuencia organizada); ademais de comisións de investigación para analizar infraccións do dereito comunitario.
O tamaño das comisións é moi variable, e a súa composición reflicte o peso que cada grupo político ten no conxunto da Eurocámara.
Cando unha comisión aborda un tema, designa un dos seus eurodeputados para elaborar o proxecto dun informe que estableza a posición do Parlamento. Os grupos políticos propoñen logo as súas emendas ao texto do informe elaborado polo eurodeputado designado, e intentan consensuar un texto final que logo será sometido ao pleno.