López Orozco destacou a importancia de seguir formándose a través de cursos especializados en sectores con demanda de traballadores.
O Alcalde de Lugo, José López Orozco, entregou os diplomas acreditativos dos cursos de Atención Sociosanitaria a persoas dependentes no domicilio, e de Xestión de emprego que se desenvolveron ao amparo do programa AFD 2014.
No acto, no que tamén participaron a Delegada Territorial da Consellería de Traballo e Benestar da Xunta de Galicia, Raquel Arias, e a Concelleira de Educación, Formación e orientación laboral, Esther Muñoz, estiveron presentes os alumnos/as que remataron as accións formativas.
López Orozco destacou a importancia de seguir formándose en sectores que teñen demanda para a inserción laboral. Ademais agradeceu que tanto a Xunta como a Unión Europea “confíe no Concello de Lugo para poder desenvolver estes cursos cos que pretendemos colaborar para conseguir o obxectivo número un, que é que os cidadáns atopen emprego.”
As accións formativas, AFDs (accións dirixidas prioritariamente a persoas traballadoras desempregadas en Galicia) está financiado polo Fondo Social Europeo a través da Consellería de Traballo e Benestar da Xunta de Galicia. Nel desenvólvense cursos de formación en diferentes sectores demandados polo mercado laboral, orientación e intermediación laboral e acompañamento por parte dos técnicos do Espazo>Lab. Con estes cursos favorécese ás persoas que teñen máis dificultades para acceder ó mercado laboral co obxectivo de dar formación e axudar a buscar traballo a veciños de Lugo.