Novas normas da Comisión Europea encamiñadas á Unión dos Mercados de Capitais
04/08/2016
A Comisión Europea propuxo modificacións dos Regulamentos sobre os fondos de capital risco europeos (FCRE) e os fondos de emprendemento social europeos (FESE), o que representa outro avance cara á creación da Unión dos Mercados de Capitais
A proposta ten por obxecto impulsar o investimento en capital risco e proxectos sociais, e facilitar aos investidores o investimento en pequenas e medianas empresas innovadoras. En concreto, a Comisión propón abrir as etiquetas dos FCRE e FESE aos xestores de fondos de todos os tamaños, e ampliar a gama de empresas nas que se pode investir. A Comisión tamén persegue facilitar e abaratar a comercialización transfronteiriza de FCRE e FESE mediante a prohibición expresa das taxas cobradas polos Estados membros e a simplificación dos trámites de rexistro.
Estas reformas forman parte dunha serie de medidas que está a tomar a Comisión Europea para estimular o capital de risco en Europa. Entre estas medidas cóntanse o uso de apoio orzamentario da UE para atraer capital procedente de grandes investidores institucionais a través dun fondo de fondos de capital risco paneuropeo, así como o fomento das mellores prácticas en materia de incentivos fiscais nacionais ao capital risco con intención de estimular os investimentos en pemes e empresas de nova creación. A Comisión Europea tamén prestará asistencia técnica aos Estados membros que desexen fomentar o financiamento a través do mercado, capital risco inclusive.
Estas medidas forman parte do Plan de Acción da Unión de Mercados de Capitais (UMC), cuxo obxecto é desbloquear os investimentos a través do mercado mediante o aumento e a diversificación das fontes de financiamento para as empresas e os proxectos a longo prazo de Europa. A proposta tamén está vinculada ao Plan de Investimentos para Europa, que establece unha estratexia global para facer fronte á escaseza de financiamento, que frea o potencial de Europa para crecer e crear postos de traballo para os seus cidadáns.
Jyrki Katainen, responsable de Fomento do Emprego, Crecemento, Investimento e Competitividade, declarou: «Hoxe eliminamos outra barreira ao investimento a escala da UE, o que constitúe un obxectivo fundamental do Plan de Investimentos para Europa. Os tres cambios principais que propoñemos hoxe nos Regulamentos FCRE e FESE (ampliar a gama de posibles xestores, ampliar a lista de activos admisibles para os FCRE e prohibir as taxas impostas polas autoridades competentes), terán como resultado que un maior número de pemes poida obter acceso ao financiamento vital necesario para o desenvolvemento das súas empresas».
O comisario Jonathan Hill declarou: «Alégrame anunciar, como o meu último acto como comisario, medidas que reforzarán os mercados europeos de capital risco. Necesitamos que as empresas europeas teñan máis opcións de financiamento e que sexan capaces de atraer o investimento que precisen aquí na UE. Isto supón outro paso cara á creación da Unión dos Mercados de Capitais».
A proposta de hoxe presentouse ao Parlamento Europeo e ao Consello (Estados membros) para a súa adopción mediante o procedemento de codecisión.
Contexto
Os Regulamentos sobre os fondos de capital risco europeos (FCRE) e os fondos de emprendemento social europeos (FESE) crearon dous novos tipos de fondos de investimento colectivo para facilitar e facer máis atractiva para os investidores o investimento en pemes que non cotizan en bolsa. Ambos Regulamentos foron adoptados o 17 de abril de 2013 e entraron en vigor o 22 de xullo de 2013.
A etiqueta FCRE e FESE permite aos xestores dos fondos comercializalos en toda a UE entre os investidores profesionais e os investidores non profesionais que poidan achegar un mínimo de 100 000 EUR.
Dada a importancia de avanzar cara a Unión dos mercados de capitais, a Comisión decidiu adiantar a revisión xeral prevista inicialmente para xullo de 2017. A Comisión Europea puxo en marcha unha consulta o 30 de setembro de 2015 a fin de preguntar se os cambios específicos no Regulamento poderían incrementar a aceptación destes fondos de investimento. O exame puxo de manifesto varios factores que frean o desenvolvemento destes fondos.
Tendo en conta as conclusións da consulta, a Comisión propón o seguinte:
- ampliar a gama de xestores autorizados para comercializar e xestionar FCRE e FESE a fin de incluír aos grandes xestores de fondos, é dicir, aos que xestionan activos por valor de máis de 500 millóns de euros; os grandes xestores poden achegar economías de escala e marcas de confianza, ofrecendo así vantaxes para os investidores, os cales poden á súa vez investir máis en beneficio último do capital risco e as empresas sociais;
- ampliar os activos admisibles para os FCRE, de maneira que se poida investir en pequenas empresas de capitalización media e pemes que cotizan nos mercados destinados a financiar o crecemento deste tipo de empresas. Espérase que isto permita a máis empresas beneficiarse dos investimentos dos FCRE e que iso faga máis atractivas os investimentos grazas a unha maior diversificación do risco;
- reducir os custos, prohibindo expresamente as taxas impostas polas autoridades competentes dos Estados membros de acollida, simplificando os procedementos de rexistro e determinando o capital mínimo para converterse en xestor.
No marco do paquete máis xeral da UMC para estimular os investimentos de capital risco na UE, un fondo de fondos de capital risco paneuropeo combinará os recursos financeiros da UE con maior volume de capital privado. Este fondo de fondos paneuropeo contribuiría a superar a fragmentación do mercado e a atraer aos investidores privados á categoría de activos de capital risco da UE.
Máis información: http://bit.ly/29R2VtN
