O Parlamento Europeo, primeira Cámara que compensa o seu CO2
08/08/2016
O Parlamento Europeo será a primeira Cámara de representación política do mundo totalmente neutra nas súas emisións de dióxido de carbono.
Para iso investirá en proxectos que absorban as emisións de CO2 imposibles de reducir lanzando unha licitación, cun orzamento máximo de 249.000 euros, que se pecha o 15 de setembro.
A Eurocámara conta cunha normativa para reducir as súas emisións de carbono dende setembro de 2011 que se revisou o ano pasado. A primeira versión obrigaba a ter en conta as emisións procedentes do consumo de enerxía no edificio do Parlamento e dos desprazamentos nos vehículos oficiais. A revisión incrementou as esixencias ata o máximo considerado polos sistemas de cálculo de CO2, e inclúe tamén emisións que considera "irredutibles", como as producidas durante os traslados de todo o persoal e dos eurodeputados entre os distintos estados membros e as dúas sedes oficiais da Eurocámara, Bruxelas e Estrasburgo.
Atendendo a estes novos criterios, calculouse que as emisións totais da entidade, entre directas e indirectas, ascenderon durante 2015 a 124.255 toneladas de CO2.
Comprar emisións de CO2
Para converterse nun organismo neutro en emisións, o lexislativo comunitario ten que acudir ao mercado e adquirir créditos de carbono xerados por proxectos limpos nunha cantidade equivalente ao volume de emisións considerado.
E para iso acaba de lanzar unha licitación internacional cun orzamento máximo de 249.000 euros, o que supón que cada tonelada de CO2 que participe na poxa terá un prezo máximo de 2 euros, menos da metade do prezo ao que cotiza o Dereito de Emisión no mercado europeo de carbono, pero o cuádruplo do prezo do crédito de carbono no mercado de CER da ONU, ao que se orienta a iniciativa.
Non poderá participar calquera na poxa xa que, ademais de seguir o complexo sistema de garantías da contratación comunitaria, a Eurocámara dispón dun sistema de xestión ambiental EMAS -o máis ambicioso que existe- e os concorrentes terán que garantir que cumprirán con todas as súas esixencias ou que xa o implementaron.
Ademais só poderán participar na poxa entidades cun nivel de negocio superior ao millón de euros e terán prioridade os proxectos limpos de África, o Caribe e algunhas zonas do Océano Pacífico. Se non concorre ningún, atenderase aos de países veciños do Mediterráneo con plans de redución de emisións remitidos á ONU; e se non hai máis remedio, aos de países candidatos á adhesión ou dalgún dos 27 socios.
