Nadia Murad e Lamiya Aji Bashar, galardoadas co Premio Sájarov á Liberdade de Conciencia na súa edición de 2016
27/10/2016
Nadia Murad Basee Taha e Lamiya Aji Bashar son sobreviventes do cativerio do Dáesh, no que foron utilizadas como escravas sexuais, e son hoxe, tras a súa fuxida, portavoces das mulleres vítimas da campaña de violencia sexual do Dáesh. Ambas son defensoras públicas da comunidade yazidí de Iraq, unha minoría relixiosa sometida a unha campaña genocida por parte do Dáesh.
En novembro de 2014 Murad logrou escapar con axuda dunha familia veciña que a sacou clandestinamente da zona controlada polo Dáesh, co que Murad puido chegar até un campo de refuxiados do norte de Iraq, e desde aí viaxar a Alemaña. Un ano despois, en decembro de 2015, Murad interveu na primeira sesión da historia do Consello de Seguridade das Nacións Unidas dedicada ao tráfico de persoas, pronunciando un vibrante discurso sobre a súa experiencia. En setembro de 2016 Murad converteuse na primeira persoa sobrevivente de tráfico de persoas en ser nomeada embaixadora de boa vontade da Oficina das Nacións Unidas contra a Droga e o Delito (ONUDD) pola dignidade dos sobreviventes do tráfico de persoas, participando posteriormente en diversas iniciativas a nivel local e mundial para a sensibilización fronte ao sufrimento das incontables vítimas deste tráfico. En outubro de 2016 o Consello de Europa distinguiuna co Premio Václav Havel aos Dereitos Humano.
Aji Bashar tratou de escapar varias veces até finalmente conseguilo o pasado abril con axuda da súa familia, que pagou os servizos de transportistas clandestinos locais. Ao pouco de atravesar a fronteira kurda, na súa fuxida cara ao territorio controlado polo Goberno iraquí, cos militantes do Dáesh pisándolle os talóns, explotoulle unha mina terrestre, matando a dous coñecidos e deixándoa a ela mesma malferida e case cega. Afortunadamente puido continuar a súa fuxida e ser posteriormente enviada a recibir tratamento médico en Alemaña, onde se reuniría cos seus irmáns e irmás sobreviventes. Desde a súa recuperación, Aji Bashar promoveu activamente a sensibilización fronte ao sufrimento da comunidade yazidí e hoxe segue axudando ás mulleres e as nenos vítimas da escravitude e das atrocidades do Dáesh.
