Nadia Murad e Lamiya Aji Bashar reciben o Premio Sájarov á Liberdade de Conciencia
13/12/2016
As gañadoras do Premio Sájarov 2016, Nadia Murad e Lamiya Aji Bashar, sobreviventes yazidíes do cativerio do Estado Islámico en Iraq, reciben hoxe o galardón nunha cerimonia durante a sesión plenaria do Parlamento Europeo en Estrasburgo (Francia). Escaparon da escravitude sexual e convertéronse en portavoces das mulleres afectadas pola campaña de violencia sexual do grupo terrorista, así como da perseguida minoría yazidí.
Quen son Nadia Murad e Lamiya Aji Bashar?
Nadia Murad Basee Taha e Lamiya Aji Bashar son de Kocho, un pobo situado na provincia iraquí de Sinjar, onde en agosto de 2014, o Estado Islámico masacró a todos os homes da aldea e capturou e esclavizó a todas as mulleres e nenos. As mulleres novas de Kocho, incluídas Aji Bashar, Murad e as súas irmás, foron secuestradas, vendidas en varias ocasións e utilizadas como escravas sexuais.
En novembro de 2014 Murad logrou escapar e chegar a un campo de refuxiados do norte de Iraq, e desde aí viaxar a Alemaña. Un ano despois, en decembro de 2015, Murad interveu na primeira sesión da historia do Consello de Seguridade das Nacións Unidas dedicada ao tráfico de persoas, onde pronunciou un vibrante discurso sobre a súa experiencia. En setembro de 2016 Murad converteuse na primeira persoa sobrevivente de tráfico de persoas en ser nomeada embaixadora de boa vontade da ONUDD pola dignidade dos sobreviventes do tráfico de persoas.
Aji Bashar tratou de escapar varias veces até conseguilo o pasado abril. Ao pouco de atravesar a fronteira kurda, na súa fuxida cara ao territorio controlado polo Goberno iraquí, resultou gravemente ferida na explosión dunha mina terrestre, que a deixou parcialmente cega. Continuou a súa fuxida e finalmente foi enviada a Alemaña para recibir tratamento médico. Desde a súa recuperación, Aji Bashar promoveu activamente a sensibilización fronte ao sufrimento da comunidade yazidí e hoxe segue axudando ás mulleres e as nenos vítimas da escravitude e das atrocidades do EI.
"Vin a miles de refuxiados pasar polo que pasamos a miña familia e eu. Estamos diseminados por todas partes. Sei que o Estado Islámico segue detrás de nós, tentando exterminarnos. Penso niso e é o que me dá forza, toda a forza, para continuar", sinala Nadia.
"Gustaríame explicar o que me sucedeu alí, non só por min, senón tamén para que outros, as outras mulleres, non reciban o mesmo trato, para que os yazidíes non teñamos que pasar nunca máis por algo así", explica Lamyia.
Segue a cerimonia en directo
A cerimonia de entrega do Premio Sájarov terá lugar este martes 13 de decembro no Parlamento Europeo, en Estrasburgo (Francia), á 12.00 hora peninsular española.
Se desexa seguir a cerimonia en directo pode facelo na nosa web ou na conta de Facebook do EP ou noutras plataformas de medios sociais coa etiqueta #Sájarov.
Despois da cerimonia, o presidente Martin Schulz, Nadia Murad e Lamiya Aji Bashar darán unha conferencia de prensa. As galardoadas tamén se reunirán cos membros das comisións de Exteriores, Desenvolvemento e Dereitos Humanos o 12 de decembro á 19.00 hora peninsular española.
Os finalistas deste ano, xornalista turco Can Dündar e ao activista ucraíno Mustafa Dzhemilev, tamén participarán na cerimonia de entrega do premio.
Máis sobre o premio Sájarov
O Premio Sájarov á Liberdade de Conciencia, que concede cada ano a Eurocámara, foi creado en 1988 para recompensar ás personalidades ou colectivos que se esforzan por defender os dereitos humanos e as liberdades fundamentais. O premio ten unha dotación de 50.000 euros.
O ano pasado o galardón recaeu no bloguero saudita Raif Badawi.que continúa en prisión por subir contido á súa web considerado blasfemo polas autoridades sauditas. Foi detido en 2012 e, posteriormente, condenado a dez anos de prisión, 1.000 lategazos e unha multa.
