04/07/2018
Dez longametraxes competirán polo galardón que outorga o Parlamento Europeo en apoio á sétima arte. Coñeza os títulos candidatos desta nova edición do certame.
O Festival Internacional de Cinema Karlovy Vary, na República Checa, marcou o comezo dunha nova edición do premio LUX. A través deste galardón cinematográfico, o Parlamento Europeo apoia a sétima arte como medio de difusión dos valores e principios sociais europeos. As 10 cintas seleccionadas déronse a coñecer o pasado 1 de xullo. Finalmente, serán tres os títulos que opten ao galardón final, e que se subtitularán nos 24 idiomas oficiais da UE para a súa exhibición nos cinemas de toda Europa o próximo outono. Un dos principais obxectivos do premio LUX de cinema: promocionar o cinema europeo, achegar as películas a grandes audiencias máis aló da súa lingua ou cultura e impulsar o debate dos valores e principios sociais de Europa ao longo do continente.
Dez películas seleccionadas
As 10 longametraxes escollidas polo panel de expertos que compoñen o xurado do premio LUX cobren unha ampla variedade de temas. Con todo, todos eles comparten elementos comúns: reflicten situacións sociais que están en plena actualidade, como a inmigración, o populismo, o nacionalismo, a globalización, os conflitos armados, a relixión ou a xustiza.
Como novidade desta edición, entre os 10 títulos seleccionados incluíronse dous documentais ( The Other Side of Everything e O silencio dos outros).
Os films elixidos, por orde alfabética segundo o seu título en inglés, son:
∙ Border/ Gräns: de Ali Abbassi (Suecia, Dinamarca)
∙ Donbass: de Sergei Loznitsa (Alemaña, Francia, Ucraína, Países Baixos, Rumania)
∙ Girl: de Lukas Dhont (Bélxica, Países Baixos)
∙ Happy as Lazzaro / Lazzaro felice: de Alice Rohrwacher (Italia, Suíza, Francia, Alemaña)
∙ Mug / Twarz: de Mał gorzata Szumovska (Polonia)
∙ Styx: de Wolfgang Fischer (Alemaña, Austria)
∙ The Other Side of Everything / Druga strana svega: de Mila Turajlić (Serbia, Francia, Qatar)
∙ O silencio dos outros: de Almudena Carracedo e Robet Bahar (España, Estados Unidos)
∙ Ou_ July 22 / Utøxa 22. juli: de Erik Pope (Noruega)
∙ Woman at War / Kona fer í stríđ: de Benedikt Erlingsson (Islandia, Francia, Ucraína)
Estes 10 nomeamentos oficiais foron reveladas o 1 de xullo pola vicepresidenta do Parlamento Europeo Evelyne Gebhardt, xunto a outros eurodeputados, no marco do Festival Internacional de Cinema Karlovy Vary.
Próximos pasos
Tres das dez películas nomeadas serán seleccionadas como finalistas a finais de xullo, durante as Xornadas dos Autores ( Giornate degli Autori) que terán lugar en Roma. Estes tres títulos serán subtitulados nas 24 linguas oficiais da Unión Europea para a súa posterior proxección nos cinemas de toda Europa durante as Xornadas do Premio Lux de Cinema, que se celebrarán o próximo outono.
A longametraxe gañadora, escollida polos eurodeputados, será anunciado finalmente durante a sesión plenaria do Parlamento Europeo en Estrasburgo o próximo 14 de novembro.
Os espectadores tamén deciden
Aínda que os eurodeputados escollen ao gañador final do certame, o público tamén pode expresar a súa opinión. Durante as Xornadas do Premio Lux de Cinema os espectadores poderán votar pola súa película favorita entre as tres finalistas. O Premio da Audiencia farase público durante o Festival de Karlovy Vary. En 2017 o galardón recaeu en Sami Blood, dirixida por Amanda Kernell. O premio foi anunciado pola romanesa Sinziana- Maria Jurau, escollida mediante sorteo entre todos os espectadores que participaron na votación.